വടക്കാഞ്ചേരി : തെക്കുംകര പഞ്ചായത്തിലെ ചെപ്പാറയില്‍ നിന്നാല്‍ ഹരിതാഭയുടെ ഒരു വിശാല ലോകം ഒന്നാകെ കാണാം.
തൃശൂര്‍ പട്ടണം ഒരു പൊട്ടു പോലെ, പുത്തന്‍പള്ളി മിനാരം തലയെടുപ്പോടെ, ചുറ്റുമുള്ള കാഴ്ച്ചകള്‍ക്കു വര്‍ണ്ണ ചന്തം. മുനിയറകള്‍ കൗതുക കാഴ്ച്ച ജില്ലയിലെ പ്രമുഖ അഡ്വൈഞ്ചര്‍ ടൂറിസം കേന്ദ്രമാകാന്‍ ചെപ്പാറ അണിഞ്ഞൊരുങ്ങുകയാണ്.
മന്ത്രി എ.സി മൊയ്തീന്‍ പ്രഖ്യാപിച്ച ആദ്യ ഘട്ട വികസന പ്രവര്‍ത്തനങ്ങളുടെ ഭാഗമായുള്ള നിര്‍മാണ പ്രവര്‍ത്തനങ്ങള്‍ അതിവേഗം പുരോഗമിക്കുകയാണ്. പാറക്കു മുകളില്‍ കുള നിര്‍മാണവും ടോയ്‌ലറ്റ് ബ്ലോക്കും സജ്ജീകരിച്ചു കഴിഞ്ഞു.
പാര്‍ക്കിങ് ഏരിയയുടെ നിര്‍മാണ പ്രവര്‍ത്തനങ്ങളും അന്തിമ ഘട്ടത്തിലാണ്.
പാറക്കു മുകളിലേക്കു പിടിച്ചു കയറാനുള്ള ഹാന്റ് റെയില്‍ പ്രവര്‍ത്തനവും ആരംഭിച്ചു കഴിഞ്ഞു. ആകെ 45 ലക്ഷം രൂപയുടെ നിര്‍മാണ പ്രവര്‍ത്തനങ്ങളാണ് നടക്കുന്നത്.
വ്യവസായ വകുപ്പിന്റെ നേതൃത്വത്തിലാണ് പ്രവര്‍ത്തനം ഏറ്റെടുത്തിട്ടുള്ളത്. ഓണത്തിന് മുന്‍പ് മുഴുവന്‍ പ്രവര്‍ത്തനങ്ങളും പൂര്‍ത്തീകരിക്കുമെന്നും വിനോദ സഞ്ചാരികള്‍ക്കു ടൂറിസം കേന്ദ്രം തുറന്നു കൊടുക്കുമെന്നും പഞ്ചായത്ത് പ്രസിഡന്റ് എം.കെ ശ്രീജ, വൈസ് പ്രസിഡന്റ് സി.വി സുനില്‍ കുമാര്‍ അറിയിച്ചു.