നെയ്യാറ്റിന്‍കര: കഴിഞ്ഞ രണ്ട് ദിവസമായി താലൂക്കില്‍ ശക്തമായ മഴയ്‌ക്കൊപ്പം വീശിയടിക്കുന്ന കാറ്റില്‍ തകരാറിലായ വൈദ്യുതി ബന്ധം പൂര്‍ണമായും പുനഃസ്ഥാപിക്കാന്‍ കഴിഞ്ഞില്ല.
ഇന്നലെ വളരെ വൈകിയും ജീവനക്കാര്‍ പരമാവധി ശ്രമം നടത്തി വരികയാണ്. നൂറ് കണക്കിന് പോസ്റ്റുകള്‍ ഒടിഞ്ഞതാണ് വൈദ്യുതി ബന്ധം തകരാറിലാകാന്‍ കാരണമെന്ന് അധികൃതര്‍ അറിയിച്ചു. നെയ്യാറ്റിന്‍കരയിലെ വിവിധ പ്രദേശങ്ങളായ അമരവിള, പാറശാലയിലെ ചെറുവാരക്കോണം, കൊച്ചോട്ടുകോണം, ധനുവച്ചപുരത്തിന്റെ വിവിധ ഭാഗങ്ങള്‍, ബാലരാമപുരം, തേമ്പാമുട്ടം, നരുവാമൂട്, ഒറ്റശേഖരമംഗലം, മണ്ഡപത്തിന്‍കടവ് തുടങ്ങിയ സ്ഥലങ്ങളില്‍ ഇനിയും വൈദ്യുതി ബന്ധം പൂര്‍ണമായി പുനഃസ്ഥാപിക്കാന്‍ കഴിഞ്ഞിട്ടില്ല. ഇനിയും കാറ്റ് കൂടുതല്‍ നാശം വിതക്കാതിരുന്നാല്‍ തന്നെ വൈദ്യുതി ബന്ധം പുനഃസ്ഥാപിക്കാന്‍ ദിവസങ്ങള്‍ വേണ്ടി വരുമെന്നാണ് സൂചന. ഇന്നലെ പുലര്‍ച്ചെ 5.30 ഓടെ താലൂക്കില്‍ വീശിയടിച്ച ശക്തമായ കാറ്റിലാണ് ഏറെയും നാശം സംഭവിച്ചത്.