കല്ലമ്പലം: നിയന്ത്രണംവിട്ട കാര്‍ കാത്തിരുപ്പ് കേന്ദ്രത്തില്‍ ഇടിച്ചുകയറി. ഞെക്കാട് ഗവ. ഹയര്‍സെക്കന്‍ഡറി സ്‌കൂളിനു മുന്നിലെ കാത്തിരുപ്പ് കേന്ദ്രത്തിലാണ് കാര്‍ ഇടിച്ചു കയറിയത്. ഞായറാഴ്ച രാവിലെ പത്തു മണിയോടെയായിരുന്നു സംഭവം. സ്‌കൂളിന് അവധിയും മഴയും ആയിരുന്നതിനാല്‍ സംഭവ സമയം കാത്തിരുപ്പ് കേന്ദ്രത്തില്‍ ആരും ഇല്ലാതിരുന്നതിനാല്‍ വന്‍ ദുരന്തം ഒഴിവായി.
അപകടത്തിനു തൊട്ടു മുമ്പാണ് ഇവിടെ ബസ് കാത്തു നിന്നിരുന്ന മൂന്ന് സ്ത്രീകള്‍ ഒരു സ്വകാര്യ ബസില്‍ കയറി പോയത്. കല്ലമ്പലത്ത് നിന്ന് വര്‍ക്കല ഭാഗത്തേക്ക് പോയ കാറാണ് അപകടത്തില്‍പ്പെട്ടത്. കാറും കാത്തിരുപ്പു കേന്ദ്രവും തകര്‍ന്നെങ്കിലും ആര്‍ക്കും പരുക്കില്ല. കാറില്‍ ഉണ്ടായിരുന്നവര്‍ കാര്‍ ഉപേക്ഷിച്ച് മറ്റൊരു വാഹനത്തില്‍ കയറി പോയതിനാല്‍ കൂടുതല്‍ വിവരങ്ങള്‍ ലഭ്യമല്ല.