വെള്ളറട: മലയോര മേഖലയില്‍ മഴക്കും കാറ്റിനും ശമനമില്ലാതെ തുടരുന്നു. ശക്തമായകാറ്റില്‍ വന്‍മരങ്ങള്‍ കടപുഴകി വീണു. വെദ്യുതിതൂണുകള്‍ പൊട്ടിവീണത് ആറാട്ട്കുഴി-കത്തിപ്പാറ റോഡില്‍ നിന്ന് നീക്കം ചെയ്തില്ല. ശക്തമായ കാറ്റില്‍ നിരവധി വീടുകളുടെ മേല്‍ക്കൂര കാറ്റില്‍ പറന്നു.
വൈദ്യുതി ബന്ധം പൂര്‍ണമായും വിച്ഛേദിച്ചതിനേ തുടര്‍ന്ന് മോബൈല്‍ ഫോണുകളുടെ പ്രവര്‍ത്തനവും നിലച്ചു. വെള്ളറട, ആര്യന്‍കോട്, ഒറ്റശേഖരം, കുന്നത്തുകാല്‍, അംബൂരി പഞ്ചായത്തുകളിലായി ആയിരകണക്കിന് വാഴകളും മരങ്ങളുമാണ് നിലം പോത്തിയത്.
ദിവസങ്ങളായി വെള്ളം കൃഷിഭൂമിയില്‍ കെട്ടിനില്‍ക്കുന്നതിനാല്‍ പച്ചക്കറികൃഷികളും മരച്ചീനികൃഷിയും അഴുകിത്തുടങ്ങി. വൈദ്യുതി ഇല്ലാത്തത് കാരണം സര്‍ക്കാര്‍ ആശുപത്രികളില്‍ അടക്കം സൂക്ഷിച്ചിട്ടുള്ള ലക്ഷ കണക്കിന് രൂപയുടെ മരുന്നുകള്‍ നശിച്ച് തുടങ്ങി. വെള്ളറട സര്‍ക്കാര്‍ ആശുപത്രിയില്‍ ലക്ഷങ്ങള്‍ മുടക്കി സോളാര്‍ പാനല്‍ സ്ഥാപിച്ചുവെങ്കിലും നിലവാരമില്ലാത്തതിനാല്‍ പ്രവര്‍ത്തനം നിലച്ചു. വിലകൂടിയ ജനറേറ്റര്‍ സ്ഥാപിച്ചുവെങ്കിലും സംരക്ഷണമില്ലാതെ പ്രവര്‍ത്തനരഹിതമായി. വൈദ്യുതി തടസം ആശുപത്രിയിലെ കിടപ്പുരോഗികളെ തീരാദുരിതത്തിലാക്കി. മൂന്ന് ദശാബ്ദങ്ങള്‍ക്ക് ശേഷം വെള്ളറട കളത്തറ പാടശേഖരത്ത് ആരംഭിച്ച നെല്‍കൃഷി വെള്ളത്തില്‍മുങ്ങി.
സമീപ വസ്തു ഉടമ രാത്രിയുടെ മറവില്‍ മണ്ണ്തട്ടി ഉയര്‍ത്തിയതോടെ വെള്ളം വാര്‍ന്ന് പോകാന്‍ കഴിയാതെ കെട്ടി നില്‍ക്കുന്നതാണ് നെല്‍കൃഷി നശിക്കാന്‍ കാരണം. കളത്തറ പാടശേഖരത്തെ കുലച്ചതും കുലക്കാറായതുമായ വാഴകള്‍ നിലം പോത്തി.
മഴ തുടരുന്നതിനാല്‍ പ്രദേശത്തെ കര്‍ഷകര്‍ കടുത്ത വറുതിയിലായിട്ടുണ്ട്. കൂലിപ്പണികള്‍ ഒന്നും നടക്കുന്നില്ല. വെള്ളറട വൈദ്യുതി വകുപ്പ് ജീവനക്കാരുടെ കെടുകാര്യസ്ഥതയാണ് വൈദ്യുതി ബന്ധം പുനഃസ്ഥാപിക്കാന്‍ വൈകുന്നതെന്ന ആരോപണമുണ്ട്.