ലക്‌നോ: തനിക്കെതിരായി പല തെറ്റിധാരണകളും പ്രചരിപ്പിക്കുന്നതിന് പിന്നില്‍ തന്റെ  കാവിവേഷവിധാനമാണെന്ന് ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ്. തന്റെ പ്രവര്‍ത്തനങ്ങളിലൂടെ തെറ്റിദ്ധാരണകള്‍ തകര്‍ത്ത് എല്ലാവിഭാഗങ്ങളുടേയും മനസ്സ് കീഴടക്കുമെന്നും അദ്ദേഹം വ്യക്തമാക്കി.

സന്തോഷത്തിന്റേയും ഐശ്വര്യത്തിന്റേയും പുത്തന്‍ പ്രവര്‍ത്തന രീതികളായിരിക്കും തന്റേതെന്നും അദ്ദേഹം കൂട്ടിച്ചേര്‍ത്തു. ആര്‍.എസ്.എസ് പ്രസിദ്ധീകരണമായ ഓര്‍ഗനൈസറിന് നല്‍കിയ അഭിമുഖത്തിലാണ് യോഗിയുടെ പ്രതികരണം.

ഇന്ത്യയുടെ സംസ്‌കാരത്തെ മതനിരപേക്ഷതയുടെ മറവില്‍ അവഹേളിക്കുന്നവര്‍ക്ക് താന്‍ അധികാരത്തിലേറിയതോടെ പേടിവന്നു തുടങ്ങിയിട്ടുണ്ടെന്നും യോഗി പറഞ്ഞു.

പല തെറ്റിധാരണകളും എനിക്കെതിരെ പടച്ചുവിടുന്നുണ്ട്. ഞാനൊരു കാവിധാരിയാണെന്ന് എല്ലാവരും പറയുന്നു. അതിനര്‍ത്ഥം കാവിയോട് എതിര്‍പ്പുള്ള കുറേയധികം പേര്‍ രാജ്യത്തുണ്ടെന്നാണ്. ഇന്ത്യയുടെ പാരമ്പര്യത്തേയും സംസ്‌കാരത്തേയും മതനിരപേക്ഷതയുടേയും പ്രീണനത്തിന്റേയും പേരില്‍ അവഹേളിക്കുന്നവര്‍ക്ക് എന്റെ സ്ഥാനാരോഹണത്തോടെ ജാഗ്രത വന്നുതുടങ്ങിയിട്ടുണ്ട്- ആദിത്യനാഥ് അഭിമുഖത്തില്‍ പറയുന്നു.


തങ്ങള്‍ രാഷ്ട്രീയത്തില്‍ ഇറങ്ങിയത് പദവിക്കും സ്ഥാനമാനത്തിനുമല്ലെന്നും  അദ്ദേഹം ചൂണ്ടിക്കാട്ടി. രാജ്യത്തിന്റെ സംരക്ഷണമാണ് തന്റെ ഗവണ്‍മെന്റിന്റെ പ്രധാന മതമെന്നും (ധര്‍മ്മം) ആദിത്യനാഥ് വ്യക്തമാക്കി.

 ഉത്തര്‍പ്രദേശിനെ അഴിമതി രഹിത ഭരണത്തിന്‍ കീഴിലാക്കുകയാണ് ലക്ഷ്യം. ഗുണ്ടാരാജില്‍ നിന്ന് സമൂഹത്തിനെ രക്ഷിക്കും. പദ്ധതികളെല്ലാം തയ്യാറാണ്. രണ്ട് മാസത്തിനുള്ളില്‍ അതിന്റെ പ്രതിഫലനമുണ്ടാവുന്നും അഭിമുഖത്തില്‍ അദ്ദേഹം പറഞ്ഞു.

കരിമ്പു കര്‍ഷകരുടെ നഷ്ടം സംബന്ധിച്ച കാര്യങ്ങള്‍ പതിനാല് ദിവസത്തിനകം പരിഹരിക്കുമെന്ന് അദ്ദേഹം ഉറപ്പു നല്‍കി. അടുത്ത ആറുമാസത്തിനകം അഞ്ചോ ആറോ പുതിയ കരിമ്പു ഫാക്ടറികള്‍ ആരംഭിക്കുമെന്നും അദ്ദേഹം ഉറപ്പു നല്‍കി.