ന്യൂഡല്‍ഹി: ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥിന്റെ ആന്റി റോമിയോ സ്‌ക്വാഡിനെ  'ആന്റി കൃഷ്ണ സ്‌ക്വാഡെ'ന്ന് വിമര്‍ശിച്ച് ട്വീറ്റ് ചെയ്തതില്‍ അഭിഭാഷകനും ആക്ടിവിസ്റ്റുമായ പ്രശാന്ത് ഭൂഷണ്‍ മാപ്പു പറഞ്ഞു. വിവാദത്തെ തുടര്‍ന്ന് തന്റെ ട്വീറ്റ് അദ്ദേഹം നീക്കം ചെയ്തു.


 ആന്റി റോമിയോ സ്‌ക്വാഡിനെതിരെയുള്ള  ട്വീറ്റില്‍ കൃഷ്ണനെ പരാമര്‍ശിച്ചത് ഉചിതമായില്ല. ട്വീറ്റ് ആരുടെയും മതവികാരത്തെ വ്രണപ്പെടുത്താന്‍ ഉദ്ദേശിച്ചുകൊണ്ടുള്ളതായിരുന്നില്ല. അത് മറ്റുള്ളവരെ വേദനിപ്പിച്ചെങ്കില്‍ മാപ്പു പറയുന്നുവെന്നും ട്വീറ്റ് നീക്കം ചെയ്യുകയാണെന്നും പ്രശാന്ത് ഭൂഷണ്‍ കുറിച്ചു.
അതിനിടെ പ്രശാന്ത് ഭൂഷണെതിരെ എഫ്.ഐ.ആര്‍ രജിസ്റ്റര്‍ ചെയ്തിട്ടുണ്ട്. മുന്‍ കോണ്‍ഗ്രസ് നേതാവ് സാവിയെ രോഡ്രഗോവിന്റെ പരാതി പ്രകാരമാണിത്.

''ഇതിഹാസത്തിലെ പൂവാലനായിരുന്നു ശ്രീകൃഷ്ണന്‍. പൂവാലശല്യം ഒഴിവാക്കാനുള്ള ആന്റി റോമിയോ സ്‌ക്വാഡിന് 'ആന്റികൃഷ്ണ സ്‌ക്വാഡ്'എന്ന് പേരിടാന്‍ ആദിത്യനാഥ് ധൈര്യപ്പെടുമോ?'എന്നായിരുന്നു അദ്ദേഹത്തിന്റെ ട്വീറ്റ്. ഏപ്രില്‍ രണ്ടിനാണ് അദ്ദേഹം വിവാദ ട്വീറ്റ് പോസ്റ്റ് ചെയ്തത്.

 
യു. പി മുഖ്യമന്ത്രി യോഗി ആദിത്യനാഥ് പൂവാല ശല്യം തടയുന്നതിന് നടപ്പാക്കിയതാണ് ആന്റി റോമിയോ സ്‌ക്വാഡ്.