കൊടുങ്ങല്ലൂര്‍: തീരദേശത്ത് കഞ്ചാവ് വില്‍പന നടത്തിയ യുവാവ് എക്‌സൈസിന്റെ പിടിയിലായി. അഴീക്കോട് മേനോന്‍ബസാര്‍ ഈശ്വരമംഗലത്ത് ശ്രീജില്‍ (19) നെയാണ് എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ടി.കെ അഷറഫും സംഘവും അറസ്റ്റ് ചെയ്തത്. അഴീക്കോട് മേനോന്‍ ബസാര്‍ പരിസരത്ത് എക്‌സൈസ് സംഘം നടത്തിയ പരിശോധനക്കിടയില്‍ എക്‌സൈസ് ജീപ്പ് കണ്ട് ഇയാള്‍ ഓടി രക്ഷപ്പെടാന്‍ ശ്രമിക്കുകയായിരുന്നു. ഇയാളെ തടഞ്ഞുനിര്‍ത്തി ദേഹപരിശോധന നടത്തിയപ്പോള്‍ അടിവസ്ത്രത്തില്‍ ഒളിപ്പിച്ച കഞ്ചാവ് പൊതികള്‍ കണ്ടെത്തുകയായിരുന്നു. തീരദേശമേഖലയില്‍ പ്രവര്‍ത്തിച്ചുവരുന്ന കഞ്ചാവ് വില്‍പന സംഘങ്ങളില്‍നിന്നും കഞ്ചാവ് ശേഖരിച്ച് സമപ്രായക്കാരായ കൂട്ടുകാര്‍ക്കും മറ്റും നല്‍കുകയായിരുന്നു ഇയാള്‍ ചെയ്തിരുന്നത്. പെയിന്റിങ് തൊഴിലാളിയായ ഇയാള്‍ക്ക് കഞ്ചാവ് കൊടുത്തിരുന്ന സംഘത്തെപ്പറ്റി സൂചന ലഭിച്ചതനുസരിച്ച് അന്വേഷണം നടത്തിവരുന്നതായും എക്‌സൈസ് സംഘം പറഞ്ഞു. എക്‌സൈസ് ഉദ്യോഗസ്ഥരായ എം.ആര്‍. നെല്‍സണ്‍, ടി.ആര്‍. സുനില്‍, ടി.കെ അബ്ദുള്‍നിയാസ്, പി.ആര്‍ സുനില്‍കുമാര്‍, ടി.എസ് സുനില്‍കുമാര്‍, ഫെന്‍സി എന്നിവരടങ്ങിയ സംഘമാണ് അറസ്റ്റ് ചെയ്തത്.