മുക്കം: സംസ്ഥാന സര്‍ക്കാരിന്റെ പൊതുവിദ്യാഭ്യാസ സംരക്ഷണ യജ്ഞത്തിന് ശക്തി പകര്‍ന്ന് പുതിയ മാതൃകയിലൂടെ വ്യത്യസ്തരാവുകയാണ് ഒരു അധ്യാപക കുടുംബം.
കോഴിക്കോട് കക്കോടി ഗവ. യു.പി സ്‌കൂള്‍ അധ്യാപകനും പന്നിക്കോട് സ്വദേശിയുമായ മജീദ് പുളിക്കലും കുടുംബവുമാണ് പൊതുവിദ്യാഭ്യാസ സംരക്ഷണത്തിന് കൈത്താങ്ങുമായി രംഗത്തെത്തിയത്. എട്ടു മാസം മുന്‍പ് കക്കോടി സ്‌കൂളില്‍ അധ്യാപകനായി എത്തിയത് മുതല്‍ സ്‌കൂളിന്റെ സമഗ്ര വികസനം ലക്ഷ്യമിട്ട് വിവിധങ്ങളായ പ്രവര്‍ത്തനങ്ങളാണ് ഇദ്ദേഹം നടത്തി കൊണ്ടിരിക്കുന്നത്.
തീര്‍ത്തും സാധാരണക്കാരായ വിദ്യാര്‍ഥികള്‍ മാത്രം പഠിക്കുന്ന ഈ സ്‌കൂളില്‍ ഇന്ന് അക്ഷര മധുരം നുകരാനെത്തുന്ന മുഴുവന്‍ വിദ്യാര്‍ഥികള്‍ക്കും ആവശ്യമായ ബാഗ്, കുട, നോട്ടു പുസ്തകങ്ങള്‍, സോപ്പ്, എന്നിവക്ക് പുറമെ സ്‌കൂള്‍ ഹരിതാഭമാക്കുന്നതിനായി ഫല വൃക്ഷത്തൈകളും ഔഷധസസ്യങ്ങളും മാത്രമല്ല ഉച്ചഭക്ഷണവിഭവങ്ങള്‍ ഒരുക്കുന്നതിനായി ചക്കയും നാളികേരവുമെല്ലാം ഈ അധ്യാപകനാണ് എത്തിച്ചുനല്‍കിയത്.
'നാട്ടുകൈനീട്ട'മെന്ന് പേരിട്ട വിഭവ വണ്ടി മജീദ് മാസ്റ്ററുടെ പന്നിക്കോട്ടെ വീട്ടില്‍നിന്നു ഇന്നലെ സ്‌കൂളിലേക്ക് പുറപ്പെട്ടു. വിഭവ വണ്ടി ജില്ലാ പഞ്ചായത്തംഗം സി.കെ കാസിം, എസ്.എസ്.എ ജില്ലാ പ്രോഗ്രാം ഓഫിസര്‍ വി. വസിഫ് എന്നിവര്‍ ചേര്‍ന്ന് ഫ്‌ളാഗ് ഓഫ് ചെയ്തു. പഞ്ചായത്ത് മുന്‍ പ്രസിഡന്റ് കെ.പി.യു അലി അധ്യക്ഷനായി. മുക്കം പ്രസ് ഫോറം സെക്രട്ടറി സി. ഫസല്‍ ബാബു, രമേശ് പണിക്കര്‍, ഉണ്ണി കൊട്ടാരത്തില്‍, ടി.കെ ജാഫര്‍, ബഷീര്‍ പാലാട്ട്, സി.വി ലുഖ്മാന്‍, ഉസ്സന്‍ കുവപ്പാറ, ഷാജി പരപ്പില്‍, സാദിഖ് പാറപ്പുറത്ത് സംസാരിച്ചു.
ഇദ്ദേഹത്തിന്റെ ഭാര്യ കുറ്റിച്ചിറ ഗവ. വൊക്കേഷനല്‍ ഹയര്‍സെക്കന്‍ഡറി സ്‌കൂള്‍ അധ്യാപിക സഫൂറ, മാതാവ് കദീസുമ്മ, മക്കള്‍ ഹംന മനാല്‍, അമല്‍ ഹനൂന്‍ എന്നിവരുടെ പൂര്‍ണ പിന്തുണയോടെയാണ് ഈ പ്രവര്‍ത്തനങ്ങളെല്ലാം നടന്നുവരുന്നത്. വിഭവ വണ്ടിയിലേക്കാവശ്യമായ ചക്കയും നാളികേരവും സംഭാവന ചെയ്തതും മജീദ് പുളിക്കലിന്റെ മാതാവാണ്. അറബി പ്രവേശനോത്സവഗാനം നിര്‍മിച്ച് പൊതുവിദ്യാഭ്യാസ സംരക്ഷണ യജ്ഞത്തിന് പുതിയ മാനം നല്‍കാനും ഇദ്ദേഹത്തിന് സാധിച്ചിരുന്നു.
കഴിഞ്ഞ രണ്ടു വര്‍ഷമായി പന്നിക്കോട് കേന്ദ്രമായി പ്രവര്‍ത്തിച്ചുവരുന്ന ഒരു കൂട്ടായ്മയുടെ നേതൃത്വത്തിന്റെ പിന്തുണയോടെയാണ് ഈ പ്രവര്‍ത്തനങ്ങളെല്ലാം നടന്നുവരുന്നത്. കക്കോടി സ്‌കൂളില്‍ വിഭവ വണ്ടിക്ക് വലിയ സ്വീകരണമാണ് ലഭിച്ചത്. സ്വീകരണ യോഗം സി. ഫസല്‍ ബാബു ഉദ്ഘാടനം ചെയ്തു. പി.ടി.എ പ്രസിഡന്റ് ഷാജി അധ്യക്ഷനായി.