നെടുമ്പാശ്ശേരി: കുന്നുകര, ചെങ്ങമനാട് പഞ്ചായത്തുകളില്‍ തുടര്‍ച്ചയായ രണ്ടാം ദിവസവും വീശിയടിച്ച ശക്തമായ കാറ്റില്‍ വന്‍ നാശനഷ്ടം. തെക്കെ അടുവാശ്ശേരി ചുങ്കം ജങ്ഷനിലെ പെട്രോള്‍ പമ്പിന് സമീപം പ്രവര്‍ത്തിച്ചിരുന്ന ചുങ്കത്ത് കുന്നുമ്മല്‍ വീട്ടില്‍ സലാമിന്റെ വര്‍ക്ക്‌ഷോപ്പ് കാറ്റില്‍ തകര്‍ന്നു വീണു.
ഞായറാഴ്ച്ച രാത്രി 9 മണിയോടെ വീശിയടിച്ച ചുഴലികാറ്റിലാണ് ഏറെയും നാശനഷ്ടം. അകത്ത് സ്ഥാപിച്ചിരുന്ന ക്രെയിന്‍ ഉള്‍പ്പെടെയുള്ള ഉപകരണങ്ങള്‍ക്കും കേടുപാടുകള്‍ സംഭവിച്ചിട്ടുണ്ട്. കണ്ടകത്ത് കൊച്ചുണ്ണിയുടെ വീടിന്റെ മുകളില്‍ ചെയ്തിരുന്ന ട്രസ് വര്‍ക് കാറ്റില്‍ ഒരു വശത്തേക്ക് ചാഞ്ഞു വീണു. കൂടാതെ ചുങ്കത്ത് നാസറിന്റെ പറമ്പിലെ വന്‍ മരം മറിഞ്ഞ് റോഡിന് കുറുകെ വീണ് നാസറിന്റെയും കൊച്ചുണ്ണിയുടെയും മതിലുകള്‍ ഭാഗീകമായി തകര്‍ന്നു. ചുങ്കം ഭാഗത്ത് ചെറുതും വലുതുമായ നിരവധി മരങ്ങള്‍ കാറ്റില്‍ കടപുഴകി വീണിട്ടുണ്ട്.
തെക്കെ അടുവാശ്ശേരി പേരെപറമ്പില്‍ കൊച്ചുമുഹമ്മദിന്റെ വീട്ടിലേക്ക് തൊട്ടടുത്ത പറമ്പിലെ പ്ലാവ് ഒടിഞ്ഞ് വീണ് വീടിന്റെ ഒരു ഭാഗത്ത് കേടുപാടുകള്‍ സംഭവിച്ചിട്ടുണ്ട്. തെക്കെ അടുവാശ്ശേരി ജങ്ഷന് സമീപവും നിരവധി വീടുകളില്‍ മരങ്ങള്‍ കടപുഴകി വീണു.വയല്‍ക്കര ചെങ്ങുനീലില്‍ ഹംസകുഞ്ഞിന്റെ വീടിനു മുകളിലേക്ക് മരം കടപുഴകി വീണ് വീടിന്റെ ഒരു ഭാഗം തകര്‍ന്നു. തെക്കെ അടുവാശ്ശേരി മുതലാളി പിടികക്ക് സമീപം തട്ടാരുപറമ്പില്‍ രാധാ ദാസന്റെ പറമ്പില്‍ നിന്നും മരം റോഡിലേക്ക് വീണ് ഗതാഗതം തടസ്സപ്പെടുകയും, വൈദ്യുതി ലൈനുകള്‍ പൊട്ടിവീഴുകയും ചെയ്തു.
ചെങ്ങമനാട് പഞ്ചായത്തിലെ പുറയാറില്‍ ഞായറാഴ്ച്ച രാത്രി വീശിയടിച്ച ശക്തമായ കാറ്റിലും, മഴയിലും വ്യാപക നാശനഷ്ടമുണ്ടായി. പുറയാര്‍ കടന്നോത്ത് പാറപ്പുറത്ത് വീട്ടില്‍ സുരേന്ദ്രന്റെ വീടിന് മുന്നില്‍ വന്‍ മരം കടപുഴകി വീണ് കാറും, വീടിന്റെ മുന്‍ ഭാഗവും തകര്‍ന്നു. കാര്‍പോര്‍ച്ചില്‍ സൂക്ഷിച്ചിരുന്ന സൈക്കിളും മരം വീണ് തകര്‍ന്നു. ഏകദേശം രണ്ടേകാല്‍ ലക്ഷത്തിന്റെ നഷ്ടം കണക്കാക്കുന്നു. മേഖലയില്‍ വാഴ, തെങ്ങ്, കവുങ്ങ് അടക്കമുള്ള കൃഷികള്‍ക്കും വന്‍ നാശം സംഭവിച്ചിട്ടുണ്ട്.
പുതുവാശ്ശേരി പുത്തന്‍കടവ് വയലോടത്ത് അഷ്‌റഫിന്റെ വീടിനു മുകളില്‍ കവുങ്ങ് ഒടിഞ്ഞ് വീണ് വീടിന്റെ ഒരു ഭാഗം തകര്‍ന്നു.വീടിനകത്തുണ്ടായിരുന്ന അഷ്‌റഫിന്റെ ഭാര്യ നഫീസയും മകന്‍ അനസും ശബ്ദം കേട്ട് ഓടി മാറിയതിനാല്‍ രക്ഷപ്പെടുകയായിരുന്നു. കപ്രശ്ശേരി കൈപ്രമ്പാടന്‍ വീട്ടില്‍ കുര്യപ്പന്റെ വീടിന്റെ മുകളില്‍ തേക്ക് മറിഞ്ഞ് വീണ് സണ്‍ ഷെയ്ഡ് തകര്‍ന്നു.