തിരുവനന്തപുരം: ശബ്ദമലിനീകരണവും അന്തരീക്ഷ മലിനീകരണവും നടത്തുന്ന ഹോളോബ്ലോക്ക് ഫാക്ടറിക്ക് 2019വരെ പ്രവര്‍ത്തനാനുമതി നല്‍കിയ മലിനീകരണ നിയന്ത്രണ ബോര്‍ഡിന്റെ നടപടി അതിശയകരമെന്ന് സംസ്ഥാന മനുഷ്യാവകാശ കമ്മിഷന്‍.
സ്ഥാപനത്തിന്റെ പ്രവര്‍ത്തനം അടിയന്തരമായി നിര്‍ത്തിവയ്ക്കണമെന്ന് കമ്മിഷന്‍ ആക്റ്റിങ് അധ്യക്ഷന്‍ പി. മോഹനദാസ് ഉത്തരവില്‍ ആവശ്യപ്പെട്ടു. പോത്തന്‍കോട് പ്രവര്‍ത്തിക്കുന്ന മദീന ഹോളോ ബ്രിക്‌സിന്റെ പ്രവര്‍ത്തനം നിര്‍ത്തിവയ്ക്കാനാണ് കമ്മിഷന്‍ ഉത്തരവിട്ടത്. കമ്മിഷന്‍ ജില്ലാ മെഡിക്കല്‍ ഓഫിസറില്‍ നിന്നും വിശദീകരണം തേടിയിരുന്നു.
തോന്നയ്ക്കല്‍ സ്വദേശി അബ്ദുള്‍ ജബാര്‍ നടത്തുന്ന സ്ഥാപനത്തിന് 2016 വരെ പഞ്ചായത്ത് പ്രവര്‍ത്തനാനുമതി നല്‍കിയിട്ടുണ്ടെന്ന് ഡി.എം.ഒയുടെ റിപ്പോര്‍ട്ടില്‍ പറയുന്നു. പോത്തന്‍കോട് ഗ്രാമപഞ്ചായത്ത് സെക്രട്ടറി സമര്‍പ്പിച്ച റിപ്പോര്‍ട്ടില്‍ സ്ഥാപനം പ്രവര്‍ത്തിക്കുന്നതു നിയമവിധേയമായിട്ടാണെന്നു പറയുന്നു. മലിനീകരണ നിയന്ത്രണ ബോര്‍ഡ് സമര്‍പിച്ച വിശദീകരണത്തില്‍ 2019വരെ സ്ഥാപനത്തിന് പ്രവര്‍ത്തനാനുമതി നല്‍കിയിട്ടുണ്ടെന്നും പൊടിശല്യം ഒഴിവാക്കാന്‍ നിര്‍ദേശം നല്‍കിയിട്ടുണ്ടെന്നും പറയുന്നു. പ്രദേശവാസികള്‍ക്ക് സ്ഥാപനത്തിന്റെ പ്രവര്‍ത്തനം ആരോഗ്യപ്രശ്‌നങ്ങള്‍ സൃഷ്ടിക്കുന്നതായി കമ്മിഷന്‍ കണ്ടെത്തി.
ശബ്ദമലിനീകരണവും അന്തരീക്ഷ മലിനീകരണവും പൂര്‍ണമായും അവസാനിപ്പിച്ചശേഷം പ്രവര്‍ത്തനാനുമതി നല്‍കിയാല്‍ മതിയെന്നും സ്വീകരിച്ച നടപടി സംബന്ധിച്ചു പോത്തന്‍കോട് പഞ്ചായത്ത് സെക്രട്ടറി ഒരു മാസത്തിനകം അറിയിക്കണമെന്നും കമ്മിഷന്‍ ഉത്തരവിട്ടു.