എടവണ്ണ: കക്കൂസ് മാലിന്യം തോട്ടിലേക്ക് തള്ളിയതായി പരാതി. എടവണ്ണ -അരീക്കോട് റോഡില്‍ ചെറിയ പാലത്തിന് താഴെയായാണ് രാത്രിയുടെ മറവില്‍ കക്കൂസ് മാലിന്യങ്ങള്‍ തള്ളിയത്. ടാങ്കിലാക്കിയ കക്കൂസ് മാലിന്യവുമായെത്തിയ വാഹനമാണ് തോട്ടിലേക്ക് ഒഴുക്കിവിട്ടതെന്നു കരുതുന്നു.
സമീപ പ്രദേശങ്ങളിലെ നിരവധി കുടുംബങ്ങളാണ് ഈ തോട്ടിലെ വെള്ളത്തിനെ ആശ്രയിച്ചു കഴിയുന്നത്. രാവിലെ വെള്ളമെടുക്കാന്‍ തോട്ടിലെത്തിയവരാണ് മാലിന്യം തള്ളിയതായി കണ്ടെത്തിയത്. ഇതേ തുടര്‍ന്ന് എടവണ്ണ ഹെല്‍ത്ത് ഇന്‍സ്‌പെക്ടര്‍ പി. അബ്ദുറഹ്മാന്റെ നേതൃത്വത്തില് ആരോഗ്യ പ്രവര്‍ത്തകര്‍ സ്ഥലത്തെത്തി ശുചീകരണ പ്രവര്‍ത്തനങ്ങള്‍ക്ക് നേതൃത്വം നല്‍കി.
തുടര്‍ന്ന് എടവണ്ണ പൊലിസിലും പരാതി നല്‍കി. മാലിന്യം തള്ളുന്നവര്‍ക്കെതിരേ കര്‍ശന നടപടി സ്വീകരിക്കണമെന്ന് പഞ്ചായത്തംഗം എ.ടി ജലീല്‍ പറഞ്ഞു.