ചവറ: നിയന്ത്രണംവിട്ട കെ.എസ്.ആര്‍.ടി.സി ബസ് കാറിലിടിച്ച് ആറുപേര്‍ക്ക് പരുക്കേറ്റു. രണ്ടാളുടെ നില ഗുരുതരമാണ്. കാര്‍ യാത്രികരായ തിരുവനന്തപുരം പോങ്ങുംമൂട് ഗൗരിനഗര്‍ 35 പുളിക്കീഴില്‍ ടോമി സിറിയക്ക് (62 ), ഭാര്യ ലൂസി ടോം (59), ഇവരുടെ മകള്‍ അനുവിന്റെ മകന്‍ ജോഹന്‍ (7), കാറിലുണ്ടായിരുന്ന അനു(31), അനുവിന്റെ മക്കളായ ജോനറ്റ് (4), റ്റിയാന്‍ (2) എന്നിവര്‍ക്കാണ് പരുക്കേറ്റത്.
ഇന്നലെ ഉച്ചയ്ക്ക് 12.30 ഓടെ ദേശീയ പാതയില്‍ ഇടപ്പള്ളിക്കോട്ടയ്ക്ക് വടക്കായിരുന്നു അപകടം. കൊല്ലത്ത് നിന്നും തൃശൂരിലേക്ക് പോവുകയായിരുന്ന കെ.എസ്.ആര്‍.ടി.സി സൂപ്പര്‍ ഫാസ്റ്റ് മറ്റൊരു വാഹനത്തെ മറിക്കടക്കാന്‍ ശ്രമിക്കുന്നതിനിടയില്‍ എതിരെ വരികയായിരുന്ന കാറില്‍ ഇടിക്കുകയായിരുന്നു.
നിയന്ത്രണം വിട്ട ബസ് സമീപത്തെ മതിലില്‍ തട്ടി നിന്നു. കാര്‍ തിരുവനന്തപുരത്തേയ്ക്ക് വരുന്നതിനിടയിലാണ് അപകടം. പരുക്കേറ്റവര്‍ കരുനാഗപ്പള്ളിയിലുള്ള സ്വകാര്യ ആശുപത്രിയില്‍ ചികിത്സയിലാണ്.