ഇന്‍ഡോര്‍: നഷ്ടമായ മൂക്ക് നെറ്റിയില്‍ പുനര്‍നിര്‍മിച്ച ശേഷം യഥാസ്ഥാനത്ത് തുന്നിച്ചേര്‍ത്ത് അപൂര്‍വ പ്ലാസ്റ്റിക് സര്‍ജറി. മധ്യപ്രദേശിലെ ഉജ്ജെയ്ന്‍ സ്വദേശിയായ അരുണ്‍പട്ടേല്‍ എന്ന പന്ത്രണ്ടുകാരനാണ് ഡോക്ടര്‍മാര്‍ പുതിയ മൂക്ക് നല്‍കിയത്.
ഒരു മാസം പ്രായമുള്ളപ്പോള്‍ എടുത്ത കുത്തിവയ്പ്പിന്റെ പാര്‍ശ്വഫലമാണ് അരുണിന്റെ മൂക്ക് ഇല്ലാതാക്കിയതെന്ന് ശസ്ത്രക്രിയക്ക് നേതൃത്വം നല്‍കിയ ഡോക്ടര്‍ അശ്വിനിദാസ് പറഞ്ഞു. നാലുഘട്ടങ്ങളിലായാണ് ശസ്ത്രക്രിയ നടത്തിയതെന്നും ഒരു വര്‍ഷംകൊണ്ടാണ് പൂര്‍ത്തീകരിച്ചതെന്നും അദ്ദേഹം പറഞ്ഞു. മൂക്ക് പൂര്‍ണമായും അപ്രത്യക്ഷമായിരുന്നതിനാല്‍ റൈനോപ്ലാസ്റ്റി കൊണ്ട് അതു പൂര്‍വസ്ഥിതിയില്‍ ആക്കാന്‍ സാധിക്കുമായിരുന്നില്ല. തുടര്‍ന്നാണു പ്രത്യേക ശസ്ത്രക്രിയയിലൂടെ ഇതു സാധ്യമാക്കിയത്. പ്രീ ഫാബ്രിക്കേറ്റഡ് ഫോര്‍ഹെഡ് ഫ്‌ളാപ് റൈനോപ്ലാസ്റ്റി എന്ന സാങ്കേതികവിദ്യയിലൂടെയാണ് ഇതു നടത്തിയത്.
ആദ്യഘട്ടത്തില്‍ ഔരു പ്രത്യേക സിലികോണ്‍ടിഷ്യൂ എക്‌സ്പാന്‍ഡര്‍ നെറ്റിയില്‍ പിടിപ്പിച്ചു. ഒരു രാസപദാര്‍ഥമുപയോഗിച്ച് അതു വളര്‍ത്തി. രണ്ടാംഘട്ടത്തില്‍ നെഞ്ചിനു താഴെ നിന്നു കാര്‍ട്ടിലേജുകള്‍ എടുത്ത് മൂക്ക് ഉണ്ടാക്കി നെറ്റിമേല്‍ മൂന്നു മാസം വച്ചു. രക്തചംക്രമണം സാധ്യമാക്കാനായിരുന്നു ഇത്. ഇതിന്റെ കോശങ്ങള്‍ പ്രവര്‍ത്തിച്ചു തുടങ്ങിയതോടെ മൂന്നാം ഘട്ടമായി ഇതെടുത്ത് യഥാസ്ഥാനത്ത് വയ്ക്കുകയായിരുന്നു. എല്ലാ ഞരമ്പുകളും തുന്നിച്ചേര്‍ക്കുകയും ചെയ്തു. ഇപ്പോള്‍ മൂക്ക് സാധാരണമായി പ്രവര്‍ത്തിക്കുന്നതായും ഡോക്ടര്‍മാര്‍ പറഞ്ഞു.നാലാം ഘട്ടത്തില്‍ നേരത്തെ മൂക്ക് പിടിപ്പിച്ചിരുന്ന നെറ്റിത്തടം സാധാരണ നിലയിലാക്കുകയായിരുന്നു ചെയതത്. മൂക്കിന് ഭാവിയില്‍ എന്തെങ്കിലും പ്രശ്‌നങ്ങള്‍ നേരിട്ടാല്‍ അതു പരിഹരിക്കാന്‍ തങ്ങള്‍ സന്നദ്ധരാണെന്നും ഡോക്ടര്‍മാര്‍ അറിയിച്ചു.

.