കരുനാഗപ്പള്ളി: ഇഫ്താറുകള്‍ മാനവസമൂഹത്തിന്റെയും മതേതരത്വത്തിന്റെയും സംഗമവേദികളാണെന്നും എല്ലാമതങ്ങളും സ്‌നേഹവും സൗഹൃദവും പങ്കിട്ട് ജീവിക്കാനാണ് സമൂഹത്തെ ഉദ്‌ബോധിപ്പിക്കുന്നതെന്നും സംസ്ഥാന ഹജ്ജ് കമ്മിറ്റി ചെയര്‍മാന്‍ തൊടിയൂര്‍ മുഹമ്മദ്കുഞ്ഞ് മൗലവി പറഞ്ഞു.
കനിവ് ചാരിറ്റബിള്‍ ട്രസ്റ്റും ട്രാവന്‍കൂര്‍ ജൂവലേഴ്‌സും സംയുക്തമായി സംഘടിപ്പിച്ച ഇഫ്താര്‍ സംഗമം ഉദ്ഘാടനം ചെയ്യുകയായിരുന്നു അദ്ദേഹം. ഇന്ത്യയുടെ ബഹുസ്വരതയും സംസ്‌ക്കാരവും കാത്തുസൂക്ഷിച്ചവരാണ് മുന്‍കാലങ്ങളില്‍ രാജ്യത്തെ നയിച്ചിട്ടുള്ളത്. മാനവ സൗഹൃദത്തിന്റെ പ്രഭ സമൂഹത്തില്‍ നിലനിര്‍ത്തിയവരാണ് അവര്‍. ഇന്ന് രാജ്യത്തെ നയിക്കുന്നവരുടെ നിലപാടുകള്‍ ഭാരതത്തിലെ മതേതര വിശ്വാസികളുടെ മനസ്സില്‍ ആശങ്ക പരത്തുവാന്‍ ഇടയാക്കുമെന്നും അദ്ദേഹം ഓര്‍മിപ്പിച്ചു.
കനിവ് ചാരിറ്റബിള്‍ ട്രസ്റ്റ് ചെയര്‍മാന്‍ എസ്. മദനന്‍പിള്ള അധ്യക്ഷനായി. കെ.പി മുഹമ്മദ് ആമുഖപ്രസംഗം നടത്തി. ടൗണ്‍ മസ്ജിദ് ഇമാം ഹാഫിസ് ഷാഹിദ് മൗലവി പ്രാര്‍ഥന നിര്‍വഹിച്ചു.
ആര്‍. രാമചന്ദ്രന്‍ എം.എല്‍.എ, എന്‍. വിജയന്‍പിള്ള എം.എല്‍.എ, നഗരസഭാ ചെയര്‍പേഴ്‌സണ്‍ എം. ശോഭന, തഹസീല്‍ദാര്‍ സാജിദാബീഗം, മുന്‍ പൊലിസ് സൂപ്രണ്ട് എം. മൈതീന്‍കുഞ്ഞ്, വരദരാജന്‍, സി.ആര്‍ മഹേഷ്, സൂസന്‍കോടി, മുനമ്പത്ത് ഷിഹാബ്, എം. അന്‍സാര്‍, കമറുദ്ദീന്‍ മുസ്‌ലിയാര്‍, സര്‍ക്കിള്‍ ഇന്‍സ്‌പെക്ട്ര്‍ രാജേഷ്, വാഴയത്ത് ഇസ്മയില്‍, എച്ച്. സലീം, നാടിയന്‍പറമ്പില്‍ മൈതീന്‍കുഞ്ഞ്, ജിജേഷ് വി. പിള്ള, കുന്നേല്‍ രാജേന്ദ്രന്‍, നിജാംബഷി, പ്രസാദ് സംസാരിച്ചു. സമ്മേളനാനന്തരം ഇഫ്താര്‍ വിരുന്നും നടന്നു.