കണ്ണൂര്‍: കേരളത്തിലെ ഏക മുസ്‌ലിം രാജവംശമായ അറക്കലിലെ സംരക്ഷിത സ്മാരകമായ അറക്കല്‍ കെട്ടിന്റെ ഒരുഭാഗം കനത്ത മഴയില്‍ തകര്‍ന്നുവീണ സംഭവത്തില്‍ നടപടിയുമായി പുരാവസ്തു വകുപ്പ്. പുരാവസ്തു വകുപ്പ് സംഘം അറക്കല്‍ പാണ്ടികശാല സന്ദര്‍ശിച്ചു. നിലവില്‍ അറക്കല്‍ കൊട്ടാരവും മറ്റ് വസ്തുക്കളും അറക്കല്‍ രാജവംശത്തിന്റെ കൈവശമാണുള്ളത്. സംരക്ഷണ ചുമതല മാത്രമാണ് പുരാവസ്തു വകുപ്പിന്. തകര്‍ന്നുവീണ അറക്കല്‍ കെട്ടിടത്തിന്റെ ബാക്കിഭാഗവും പൊളിച്ചുനീക്കണമെന്ന് കാണിച്ച് കണ്ണൂര്‍ തഹസില്‍ദാര്‍ അറക്കല്‍ രാജവംശത്തിന് നോട്ടിസ് നല്‍കി. അപകട ഭീഷണി ഉയര്‍ത്തുന്ന പാണ്ടികശാലയുടെ ബാക്കി ഭാഗം വീണ്ടും പൊളിഞ്ഞ് വീണാല്‍ ഉണ്ടാകുന്ന നഷ്ടത്തിന്‍ പൂര്‍ണ ഉത്തരവാദി ഉടമകളാണെന്ന് കാണിച്ചാണ് നോട്ടിസ്. കണ്ണൂര്‍ സിറ്റിയില്‍ മാപ്പിള ബേ ഹാര്‍ബറിനോടു ചേര്‍ന്നുള്ള അറക്കല്‍ കെട്ടിലെ പാണ്ടികശാലയാണ് കഴിഞ്ഞദിവസം കനത്തമഴയില്‍ റോഡിലേക്ക് ഇടിഞ്ഞുവീണത്. 400 വര്‍ഷം പഴക്കമുള്ള കെട്ടിടമാണിത്. പൈതൃക നിരയില്‍പെടുന്ന കെട്ടിടമായിട്ടും കാര്യമായ നവീകരണങ്ങളോ സംരക്ഷണ പ്രവര്‍ത്തനങ്ങളോ നടത്താതിരുന്നതാണ് തകര്‍ച്ചയ്ക്കു കാരണം. അറക്കല്‍ കെട്ടിന്റെ ഭാഗമായ മ്യൂസിയം നേരത്തെ സര്‍ക്കാര്‍ സംരക്ഷിച്ച് നവീകരിച്ചിരുന്നു. പാണ്ടികശാല ഉള്‍പ്പെടെയുള്ള മറ്റു കെട്ടിടങ്ങളെ സര്‍ക്കാര്‍ വേണ്ടരീതിയില്‍ സംരക്ഷിക്കാത്തതാണ് തകര്‍ച്ചയ്ക്കു കാരണമായി നാട്ടുകാര്‍ പറയുന്നത്. പുരാവസ്തു വകുപ്പ് മന്ത്രി രാമചന്ദ്രന്‍ കടന്നപ്പള്ളിയുടെ സെക്രട്ടറി കെ.പി ദിലീപ്. മന്ത്രിയുടെ മണ്ഡലം പ്രതിനിധി യു. ബാബു ഗോപിനാഥ്, പുരാവസ്തു വകുപ്പ് എന്‍ജിനിയര്‍ മുകേഷ് എന്നിവരാണ് തകര്‍ന്നുവീണ പാണ്ടികശാല സന്ദര്‍ശിച്ചത്.