ഫറോക്ക്: നാര്‍ക്കോട്ടിക് പൊലിസ് ചമഞ്ഞ് വീട്ടില്‍ കയറി യുവാവിനെ പിടിച്ചുകൊണ്ടുപോയി മര്‍ദിച്ച് പണം തട്ടാന്‍ ശ്രമിച്ച സംഭവത്തില്‍ മൂന്നു പേര്‍ അറസ്റ്റില്‍. ചെറുവണ്ണൂര്‍ എം.കെ.സി ഹൗസില്‍ മുസ്തഫ ലിയാസ്, കോഴിക്കോട് സെന്റര്‍ മാര്‍ക്കറ്റിനു സമീപം കെ.പി.എം.കെ ഹൗസില്‍ മുഹമ്മദ് ഇല്യാസ്, ചേലേമ്പ്ര പടിഞ്ഞാറ്റുംപൊഴിയില്‍ ജിനീഷ് എന്നിവരെയാണ് ഫറോക്ക് പൊലിസ് അറസ്റ്റ് ചെയ്തത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.
കഴിഞ്ഞ മാസം മൂന്നിനാണ് കേസിനാസ്പദമായ സംഭവം. ഫറോക്ക് ചുങ്കം കുന്നത്ത് കുഴി അബ്ദു സഫീറിനെ വീട്ടില്‍ കയറി ഇവര്‍ നാര്‍ക്കോട്ടിക് വിഭാഗം പൊലിസാണെന്നും കഞ്ചാവ് വില്‍പ്പനയുണ്ടെന്നും പറഞ്ഞ് കാറില്‍ ചെറുവണ്ണൂര്‍ സ്രാമ്പ്യക്കു സമീപം ആര്‍.എസ് മോട്ടേഴ് എന്ന വര്‍ക്ക്‌ഷോപ്പിനുള്ളില്‍ എത്തിക്കുകയായിരുന്നു.
ഇവിടെവച്ച് ക്രൂരമായി മര്‍ദിച്ച് നഗ്നനാക്കി ഫോട്ടോയെടുത്ത് പണം തട്ടുകയായിരുന്നു. ഇതേസമയം സഫീറിന്റെ സുഹൃത്ത് അരുണ്‍ ഫോണ്‍ വിളിച്ചെത്തിയപ്പോള്‍ ഇദ്ദേഹത്തെയും ദേഹോപദ്രവമേല്‍പ്പിച്ചു. കേസില്‍നിന്ന് ഒഴിവാക്കണമെങ്കില്‍ ഇരുവരും ഓരോ ലക്ഷം വീതം നല്‍കണമെന്നും ഇവര്‍ ആവശ്യപ്പെട്ടു. ഇതിനിടെ കൈവശമുണ്ടായിരുന്ന അരുണിന്റെ 3000 രൂപയും സംഘം കൈക്കലാക്കി. ഒരാഴ്ചക്കുള്ളില്‍ ആവശ്യപ്പെട്ട പണം തന്നില്ലെങ്കില്‍ കൈകാലുകള്‍ വെട്ടുമെന്നും വാഹനമിടിപ്പിച്ചു കൊല്ലുമെന്നും ഭീഷണിപ്പെടുത്തിയിരുന്നു. രാത്രി ഒന്‍പതിനു വര്‍ക്ക്‌ഷോപ്പിലെത്തിച്ച രണ്ടുപേരെയും പിറ്റേന്നു പുലര്‍ച്ചെ നാലരയ്ക്കാണ് വിട്ടയച്ചത്.