സിംഗപ്പൂര്‍: മാസങ്ങള്‍ നീണ്ട ചര്‍ച്ചകള്‍ക്ക് വിരാമമിട്ട് സെന്റോസ് ദ്വീപില്‍ നടന്ന ആ കൂടിക്കാഴ്ചക്കൊടുവില്‍ ഇരു നേതാക്കളും കഴിഞ്ഞതെല്ലാം മറക്കുന്ന കാഴ്ചയായിരുന്നു കാണാനായത്. ഭൂതകാലം മറന്നേക്കൂ എന്ന് അമേരിക്കന്‍ പ്രസിഡന്റ് ഡൊണാള്‍ഡ് ട്രംപും ഉത്തരകൊറിയന്‍ ഏകാധിപതി കിം ജോങ് ഉന്നും ഒരുമിച്ച് ചേര്‍ന്ന് നിന്ന് പറഞ്ഞ ദിവസം. ഉത്തരകൊറിയയുമായുള്ള ബന്ധം ഇനി പുതിയ തലത്തിലായിരിക്കുമെന്ന് ട്രംപ് വ്യക്തമാക്കിയപ്പോള്‍ നിര്‍ണായകമായ മാറ്റങ്ങള്‍ക്കാവും ഇനി ലോകം സാക്ഷ്യം വഹിക്കുകയെന്നായിരുന്നു കിമ്മിന്റെ പ്രതികരണം.
കൂടിക്കാഴ്ച സംബന്ധിച്ച അനിശ്ചിതത്വവും ഊഹാപോഹങ്ങളുമെല്ലാം മറികടന്നുവെന്നും ലോക സമാധാനത്തിന് മികച്ചൊരു കാല്‍വയ്പായിരിക്കും ഈ ചര്‍ച്ചയെന്നും കിം വ്യക്തമാക്കി.