കുന്ദമംഗലം: കണക്കില്‍ പെടാത്ത പണവുമായി പിടികൂടിയ കാര്‍ ഒരാഴ്ച കഴിഞ്ഞ് വീണ്ടും പരിശോധിച്ചപ്പോള്‍ ലഭിച്ചത് അരക്കോടിക്കടുത്ത് കുഴല്‍പ്പണം. വാഹന പരിശോധനക്കിടെ കഴിഞ്ഞ മാസം 27ന് രാത്രി 11 ന് കാറില്‍ സഞ്ചരിക്കുകയായിരുന്ന രണ്ട് പേരില്‍ നിന്നായി രേഖകളില്ലാത്ത 2.13 ലക്ഷം രൂപ കുന്ദമംഗലം പൊലിസ് സബ് ഇന്‍സ്‌പെക്ടര്‍മാരായ വി.വി വിമല്‍, പി. വിശ്വനാഥന്‍ എന്നിവരുടെ നേതൃത്വത്തിലുള്ള സംഘം പിടികൂടിയിരുന്നു.
കസ്റ്റഡിയിലെടുത്ത കാര്‍ കുന്ദമംഗലം പൊലിസ് സ്‌റ്റേഷന്‍ കോമ്പൗണ്ടിലായിരുന്നു നിര്‍ത്തിയിട്ടിരുന്നത്. അസി.കമ്മിഷണര്‍ (നോര്‍ത്ത്) പൃഥ്വിരാജിന് ലഭിച്ച രഹസ്യ വിവരത്തെ തുടര്‍ന്ന് കുന്ദമംഗലം കോടതിയുടെ അനുമതിയോടെ ഇന്നലെ ഉച്ചക്ക് കാര്‍ വീണ്ടും പരിശോധിച്ചപ്പോഴാണ് പണം ലഭിച്ചത്.
കാറിന്റെ ബോണറ്റിനുള്ളില്‍ ഒളിപ്പിച്ചുവച്ച നിലയിലാണ് 48 ലക്ഷം രൂപ കൂടി കുന്ദമംഗലം പൊലിസ് കണ്ടെത്തിയത്. കൊടുവള്ളി സ്വദേശികളായ യൂസുഫ്, ജംഷീര്‍ എന്നിവരാണ് കാറിലുണ്ടായിരുന്നത്. കോടതിയില്‍ ഹാജരാക്കിയ ഇവരെ ജാമ്യത്തില്‍ വിട്ടിരുന്നു. എന്നാല്‍ വാഹനം വിട്ടുകൊടുത്തിരുന്നില്ല. കൊടുവള്ളി കേന്ദ്രമായി പ്രവര്‍ത്തിക്കുന്ന കുഴല്‍പ്പണ മാഫിയ സംഘത്തിലെ കണ്ണികളാണിവരെന്ന് പൊലിസ് പറഞ്ഞു.