കൊച്ചി: സാന്റിയാഗോ മാര്‍ട്ടിനാണ് എല്‍.ഡി.എഫ് സര്‍ക്കാറിന്റെ സ്‌പോണ്‍സറെന്ന് കോണ്‍ഗ്രസ് നേതാവും എം.എല്‍.യുമായ വി.ഡി സതീശന്‍. ലോട്ടറി രാജാവ് സാന്റിയാഗോ മാര്‍ട്ടിന് വേണ്ടി മുഖ്യമന്ത്രിയുടെ നിയമോപദേഷ്ടാവായ എം.കെ ദാമോദരന്‍ ഹൈക്കോടതിയില്‍ ഹാജരായ നടപടിക്കെതിരെയാണ് അദ്ദേഹം സര്‍ക്കാറിനെതിരെ ആഞ്ഞടിച്ചത്. മാര്‍ട്ടിന് കേരളത്തിലേക്ക് കടന്നുവരാനുള്ള ചുവന്ന പരവതാനി വിരിക്കുകയാണ് സര്‍ക്കാര്‍ ചെയ്യുന്നതെന്നും അദ്ദേഹം കുറ്റപ്പെടുത്തി. ഈ വിഷയത്തില്‍ സര്‍ക്കാര്‍ മറുപടി പറയണമെന്നും അദ്ദേഹം പറഞ്ഞു. യു.ഡി.എഫ് സര്‍ക്കാറിന്റെ കാലത്ത് മാര്‍ട്ടിനുവേണ്ടി കോണ്‍ഗ്രസ് വക്താവ് അഭിഷേക് സിംഖ്‌വി ഹാജരായതിനെ ശക്തമായി വിമര്‍ശിച്ചവരാണ് സി.പി.എം. അന്ന് വിമര്‍ശനമുയര്‍ന്നപ്പോള്‍ അദ്ദേഹത്തെ മാറ്റാന്‍ കോണ്‍ഗ്രസ് തയാറായിരുന്നു. എന്നാല്‍ ഇന്ന് സര്‍ക്കാര്‍ അഭിഭാഷകനാണ് മാര്‍ട്ടിനു വേണ്ടി ഹാജരായത്.

വി.എസ് അച്യുതാനന്ദന്‍ ഇക്കാര്യത്തില്‍ തന്റെ നിലപാട് വ്യക്തമാക്കണമെന്നും അദ്ദേഹം പറഞ്ഞു. കഴിഞ്ഞ എല്‍.ഡി.എഫ് സര്‍ക്കാറിന്റെ കാലത്ത് കേരളത്തില്‍ നിന്ന് 80000 കോടി രൂപയാണ് മാര്‍ട്ടിന്‍ കടത്തിയതെന്നാണ് വി.എസ് പറഞ്ഞിരുന്നത്. അന്ന് സര്‍ക്കാറുമായി മാര്‍ട്ടിന് ബന്ധമുണ്ടെന്നതിന് രേഖമൂലമുള്ള തെളിവ് പുറത്തുവന്നിരുന്നു. അതിന് നേതൃത്വം നല്‍കിയ ഇ.പി ജയരാജന്‍ ഇന്ന് മന്ത്രിസഭയിലെ രണ്ടാം സ്ഥാനക്കാരനാണെന്നും അദ്ദേഹം കുറ്റപ്പെടുത്തി.