തിരുവനന്തപുരം: സംസ്ഥാന സിലബസ് പ്രകാരം സര്‍ക്കാര്‍ അംഗീകാരത്തോടെ സംസ്ഥാനത്തു പ്രവര്‍ത്തിക്കുന്ന അംഗീകൃത വിദ്യാലയങ്ങള്‍ക്കുള്ള പാഠപുസ്തകങ്ങള്‍ വിതരണം ചെയ്യാന്‍ ഇതുവരെയും നടപടിയെടുക്കാത്ത സര്‍ക്കാര്‍ നിലപാടില്‍ പ്രതിഷേധിച്ച് കേരളാ അംഗീകൃത സ്‌കൂള്‍ മാനേജ്‌മെന്റ് അസോസിയേഷന്‍ സംസ്ഥാന കമ്മിറ്റി പൊതുവിദ്യാഭ്യാസ ഡയറക്ടറുടെ കാര്യാലയത്തിനു മുന്നില്‍ പ്രതിഷേധ ധര്‍ണ നടത്തി. കെ. മുരളീധരന്‍ എം.എല്‍.എ ഉദ്ഘാടനം ചെയ്തു. ഏതു വിദ്യാലയത്തില്‍ പഠിക്കുന്ന കുട്ടികളും സംസ്ഥാനത്തെ വിദ്യാര്‍ഥികളാണെന്നും പാഠപുസ്തകം എന്നത് ഓരോ വിദ്യാര്‍ഥിയുടെയും അവകാശമാണെന്നും ആ അവകാശങ്ങള്‍ സംരക്ഷിക്കപ്പെടേണ്ടതാണെന്നും അദ്ദേഹം പറഞ്ഞു. സംസ്ഥാന പ്രസിഡന്റ് വി.കെ ജയകുമാര്‍ അധ്യക്ഷത വഹിച്ചു.
ജനറല്‍ സെക്രട്ടറി കെ.കെ ഷാജഹാന്‍, പി.കെ മുഹമ്മദ് ഹാജി, പി. കുഞ്ഞിമൊയ്തീന്‍ മാസ്റ്റര്‍, ആര്‍.എം ബഷീര്‍, മുജീബ് പൂളക്കല്‍, എന്‍.പി സജീവന്‍ എന്നിവര്‍ സംസാരിച്ചു.
കെ.വി മൂസക്കുട്ടി, അഡ്വ. ടി.പി അന്‍വര്‍, ഷിജിന്‍ കലാം, പി.കെ ജാഫര്‍ എന്നിവര്‍ നേതൃത്വം നല്‍കി. സര്‍ക്കാര്‍ അംഗീകാരമുള്ള അണ്‍ എയ്ഡഡ് സ്‌കൂളുകള്‍ക്കു പാഠപുസ്തകം നല്‍കാന്‍ ഉടന്‍ നടപടി ഉണ്ടാകണമെന്നാവശ്യപ്പെട്ട് പൊതുവിദ്യാഭ്യാസ ഡയറക്ടര്‍ക്കു നിവേദനവും നല്‍കി.