ശ്രീനഗര്‍: യുദ്ധവിമാനമായ മിഗ് 29 പറത്തുന്ന ആദ്യ ഇന്ത്യന്‍ വനിതയെന്ന റെക്കോഡ് സ്വന്തമാക്കാനൊരുങ്ങി കശ്മീരി പൈലറ്റായ ആയിശ അസീസ്. കഴിഞ്ഞ ആഴ്ച കൊമേഴ്‌സ്യല്‍ പൈലറ്റ് ലൈസന്‍സ് കൈപറ്റിയതോടെ പൈലറ്റെന്ന തന്റെ സ്വപ്‌ന സാക്ഷാത്ക്കാരത്തിലേക്ക് ഒരു ചുവടുകൂടി അടുത്തതിന്റെ സന്തോഷത്തിലാണ് ഈ ഇരുപത്തിയൊന്നുകാരി.  

റഷ്യയിലെ സോകുള്‍ എയര്‍ ബേസില്‍ നിന്നാണ് ആയിഷ മിഗ് വിമാനം പറത്തുക. ശബ്ദവേഗത്തെ മറികടന്ന് ജെററ് വിമാനം പറത്തുന്ന ഏറ്റവും പ്രായം കുറഞ്ഞ ഇന്ത്യന്‍ വനിതയെന്ന പദവിയും ഇതോടെ ആയിശ സ്വന്തമാക്കും.

ബോംബെ ഫ്‌ളെയിങ് ക്ലബില്‍ നിന്ന് 16 ാം വയസിലാണ് ആയിശ സ്റ്റുഡന്റ് പൈലറ്റ് ലൈസന്‍സ് നേടിയത്. 2012ല്‍ നാസയില്‍ നിന്നും സ്‌പേസ് ട്രൈയിനിങ് കോഴ്‌സും പാസായി. തെരഞ്ഞെടുക്കപ്പെട്ട മൂന്ന് ഇന്ത്യക്കാരില്‍ ഒരാളാണ് ആയിശ. സുനിത വില്യംസാണ് തന്റെ സ്വപ്‌നങ്ങളുടെ പ്രചോദനമെന്ന് ആയിശ പറയുന്നു. സുനിതയെ പോലെ ബഹിരാകാശ യാത്രയും ആയിശയുടെ സ്വപ്‌നമാണ്.

ആയിഷയുടെ മാതാവ് കശ്മീരിലെ ബാരാമുല്ല സ്വദേശിയും പിതാവ് മുംബൈ സ്വദേശിയുമാണ്. അയിശയുടെ നേട്ടങ്ങളില്‍ അഭിമാനിക്കുന്നുവെന്ന് ആയിശയുടെ സഹോദരന്‍ അരീബ് ലോക്കണ്ട്‌വാല പ്രതികരിച്ചു. അവള്‍ ഉയരങ്ങളില്‍ നിന്ന് ഉയരങ്ങളിലേക്കു പറക്കണമെന്നാണ് തങ്ങളുടെ ആഗ്രഹമെന്നും അരീബ് കൂട്ടിച്ചേര്‍ത്തു.