തേഞ്ഞിപ്പലം: ബിരുദ ഫലപ്രഖ്യാപനത്തിന് പുറമെ മാര്‍ക്ക് ലിസ്റ്റും പ്രൊവിഷനല്‍ സര്‍ട്ടിഫിക്കറ്റും വിതരണം ചെയ്യുന്നതിലും കാലിക്കറ്റ് സര്‍വകലാശാല ചരിത്ര നേട്ടത്തിലേക്ക്. റെക്കാഡ് വേഗത്തില്‍ ഫലം പ്രസിദ്ധീകരിച്ച ഫൈനല്‍ ഡിഗ്രി പരീക്ഷയുടെ 88,000 മാര്‍ക്ക് ലിസ്റ്റുകളും, വിജയികളുടെ പ്രൊവിഷനല്‍ സര്‍ട്ടിഫിക്കറ്റുകളും ഇന്ന്്്് വിവിധ കോളജിലെത്തുന്നു. പത്ത് വാഹനങ്ങളിലായി ഇവ അയക്കുന്നതിന്റെ ഉദ്ഘാടനം പരീക്ഷാഭവനില്‍ നടന്ന ചടങ്ങില്‍ വൈസ് ചാന്‍സലര്‍ ഡോ.കെ.മുഹമ്മദ് ബഷീര്‍ നിര്‍വഹിച്ചു. പരീക്ഷാ മോണിറ്ററിങ് സെല്ലിലെ സെക്ഷന്‍ ഓഫിസര്‍ എ.ആര്‍.രാജേഷ് ആദ്യപാക്കറ്റ് ഏറ്റുവാങ്ങി.
റഗുലര്‍ കോളജിലെ വിദ്യാര്‍ത്ഥികള്‍ക്കൊപ്പംതന്നെ വിദൂരപഠന വിഭാഗം വിദ്യാര്‍ഥികളുടെയും മാര്‍ക്ക്‌ലിസ്റ്റുകളും സര്‍ട്ടിഫിക്കറ്റുകളും നല്‍കുന്നതും സംസ്ഥാനത്ത് ആദ്യമാണ്. റഗുലര്‍ വിഭാഗത്തിലെ 48000 വും വിദൂര വിഭാഗത്തിലെ 40000 വും മാര്‍ക്ക്‌ലിസ്റ്റുകളാണുള്ളത്.
മാര്‍ക്ക്‌ലിസ്റ്റുകളും സര്‍ട്ടിഫിക്കറ്റുകളും നേരത്തെ ലഭിച്ചത് സംസ്ഥാനത്തിന് പുറത്തെ കോളജുകളില്‍ പ്രവേശനം ആഗ്രഹിക്കുന്നവര്‍ക്ക് വലിയ പ്രയോജനം ചെയ്യുമെന്ന് വൈസ്ചാന്‍സലര്‍ ചൂണ്ടിക്കാട്ടി. ചടങ്ങില്‍ പ്രോവൈസ്ചാന്‍സലര്‍ ഡോ.പി.മോഹന്‍, രജിസ്ട്രാര്‍ ഡോ.ടി.എ.അബ്ദുല്‍ മജീദ്, പരീക്ഷാ കണ്‍ട്രോളര്‍ ഡോ.വി.വി.ജോര്‍ജ്ജ് കുട്ടി, സിന്റിക്കേറ്റംഗങ്ങളായ ഡോ.സി.എല്‍.ജോഷി, ഡോ.സി.അബ്ദുല്‍ മജീദ്, കെ.കെ.ഹനീഫ, ഡോ.എം.സത്യന്‍, ഡോ.ജി.റിജുലാല്‍, ജോയന്റ് കണ്‍ട്രോളര്‍മാര്‍, പരീക്ഷാവിഭാഗത്തിലെ മറ്റ്ജീവനക്കാര്‍ തുടങ്ങിയവര്‍ പങ്കെടുത്തു.