കൊച്ചി: മേജര്‍ ആര്‍ച്ച് ബിഷപ്പ് കര്‍ദിനാള്‍ ജോര്‍ജ് ആലഞ്ചേരിയുടെ കോലം കത്തിക്കുകയും പ്രകോപനപരമായി പ്രസംഗിക്കുകയും ചെയ്ത സംഭവത്തില്‍ എറണാകുളം സെന്‍ട്രല്‍ പൊലിസ് രജിസ്റ്റര്‍ ചെയ്ത കേസില്‍ ഒരാള്‍ അറസ്റ്റില്‍.
നെടുമ്പാശേരി കാഞ്ഞൂക്കാരന്‍ വീട്ടില്‍ ദേവസ്യയുടെ മകന്‍ ബിജു ഡേവിഡ് (45) നെയാണ് അറസ്റ്റ് ചെയ്തത്. സിറോ മലബാര്‍ സഭാ വിശ്വാസികള്‍ക്കിടയില്‍ പ്രകോപനമുണ്ടാക്കി ലഹളയുണ്ടാക്കണമെന്നുള്ള ഉദ്ദേശ്യത്തോടെ സംഘം ചേര്‍ന്ന് ആലഞ്ചേരിയുടെ കോലം കത്തിക്കുകയും പ്രകോപനപരമായി പ്രസംഗിക്കുകയും ചെയ്‌തെന്നാണ് പരാതി.
ജൂണ്‍ അഞ്ചിന് ആര്‍ച്ച് ബിഷപ്പ് ഹൗസിനു മുമ്പിലായിരുന്നു കേസിന് ആസ്പദമായ സംഭവം. എറണാകുളം അസി. കമ്മിഷണര്‍ കെ. ലാല്‍ജിയുടെ മേല്‍നോട്ടത്തില്‍ സെന്‍ട്രല്‍ പൊലിസ് ഇന്‍സ്‌പെക്ടര്‍ എ. അനന്തലാല്‍, എസ്.ഐമാരായ ജോസഫ് സാജന്‍, സുനുമോന്‍, സീനിയര്‍ സി.പി.ഒ ജോസഫ്, എന്നിവരടങ്ങുന്ന സംഘമാണ് കേസ് അന്വേഷിക്കുന്നത്.