കഠിനംകുളം: മേനംകുളം സ്വദേശിനിയായ യുവതിയെ ഓട്ടോറിക്ഷയില്‍ വച്ച് പീഡിപ്പിക്കാന്‍ ശ്രമിച്ച ഓട്ടോറിക്ഷ ഡൈവര്‍ അറസ്റ്റില്‍. ബീമാപള്ളി സദാംനഗര്‍ പുതുവല്‍പുരയിടം സമീറാമന്‍സില്‍ അന്‍സാരി(37) ആണ് വീടിനടുത്ത് ഒളിവില്‍ കഴിയുന്നതിനിടെ കഴിഞ്ഞ ദിവസം അറസ്റ്റിലായത്.
യാത്രക്കിടെ യുവതിയെ പ്രലോഭിപ്പിച്ച് തട്ടികൊണ്ട് പോയതിനും സ്ത്രീത്വത്തെ അപമാനിച്ചതിനും പീഡനശ്രമത്തിനുമാണ് പ്രതിക്കെതിരേ കേസുകള്‍ എടുത്തിരിക്കുന്നത്. ദേശീയപാതയില്‍ തോന്നയ്ക്കല്‍ പതിനാറാംമൈലിന് സമീപം ഞായറാഴ്ച രാത്രിയിലാണ് സംഭവം. ഭര്‍ത്താവിന്റെ മദ്യപാനം നിര്‍ത്താന്‍ ഹരിപ്പാടുള്ള ലഹരിമുക്ത കേന്ദ്രത്തിലേക്ക് പോകുകയായിരുന്ന യുവതിക്കാണ് ദുരനഭുവമുണ്ടായത്.
ഭര്‍ത്താവിന്റെ സുഹൃത്തായ പ്രതിയുടെ ഓട്ടോറിക്ഷയിലാണ് യുവതി ഭര്‍ത്താവ് മൊത്ത് യാത്ര ചെയ്തത്. കഴക്കൂട്ടം ജങ്ഷനില്‍ വച്ച് ഓട്ടോറിക്ഷ വേഗത കുറച്ചപ്പോള്‍ ഭര്‍ത്താവ് ഓട്ടോയില്‍ നിന്നും ചാടി രക്ഷപ്പെട്ടു. ഓട്ടോക്കാരനും യുവതിയുമായി ഇയാള്‍ക്കുവേണ്ടി തിരച്ചില്‍ നടത്തിയെങ്കിലും കണ്ടെത്താനിയില്ല.
പിന്നീട് പോത്തന്‍കോട് ലഹരിവിരുദ്ധ കേന്ദ്രമുണ്ടെന്നും അവിടെ പോയി മരുന്ന് വാങ്ങി നല്‍കിയാല്‍ കുടി നിടത്തി കിട്ടുമെന്ന് പറഞ്ഞ് അന്‍സാരി യുവതിയെ അങ്ങോട്ടേക്ക് കൂട്ടി കൊണ്ടുപോകുകയായിരുന്നു. മംഗലപുരത്ത് എത്തിയപ്പോള്‍ പോത്തന്‍കോട്ടേക്കുള്ള വഴി തിരിയാതെ ഓട്ടോറിക്ഷ നേരെ ആറ്റിങ്ങല്‍ ഭാഗത്തേക്കാണ് പോയത്. ഇതിനിടയിലാണ് ഓട്ടോകാരന്‍ യുവതിയെ കടന്നുപിടിച്ച് മാനഭംഗപ്പെടുത്താന്‍ ശ്രമിച്ചത്. ഇതിനിടെ ഓട്ടോയില്‍ പുറത്തേക്ക് ചാടിയ യുവതി റോഡില്‍ വീണ് പരുക്കേറ്റിരുന്നു.
ആറ്റിങ്ങല്‍ ഡിവൈ.എസ്.പി അനില്‍കുമാറിന്റെ നിര്‍ദേശാനുസരണം മംഗലപുരം എസ്.എച്ച്.ഒ. അജയന്‍, എ.എസ്.ഐ ഷാജി, സിവില്‍ പൊലിസ് ഓഫിസര്‍മാരായ സജീദ്, പ്രവീണ്‍ എന്നിവരടങ്ങുന്ന സംഘമാണ് പ്രതിയെ അറസ്റ്റുചെയ്തത്. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.