പട്ടിക്കാട്: രാജ്യത്ത് കോണ്‍ഗ്രസ് പാര്‍ട്ടി ദുര്‍ബലമായി കൊണ്ടിരിക്കുകയാണെന്നും മതേതരത്വം സംരക്ഷിക്കാന്‍ ഇടതുപക്ഷത്തിന് മാത്രമെ കഴിയൂവെന്നും സിനിമാ നടനും എം.എല്‍.എയുമായ മുകേഷ് പറഞ്ഞു. കീഴാറ്റൂരില്‍ എല്‍.ഡി.എഫ് സ്ഥാനാര്‍ഥി അഡ്വ. എം.ബി ഫൈസലിന്റെ തെരഞ്ഞെടുപ്പ് പ്രചാരണ യോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

കോണ്‍ഗ്രസ് മതേതര പാര്‍ട്ടിയാണെങ്കിലും അവര്‍ ദുര്‍ബലമായി കൊണ്ടിരിക്കുന്ന അവസ്ഥയാണ് ഇന്നുള്ളത്. ഇതിന്റെ ഉദാഹരണമാണ് മണിപ്പൂരിലും ഗോവയിലും കണ്ടെതെന്നും അദ്ദേഹം പറഞ്ഞു. മതനിരപേക്ഷതയെ സംരക്ഷിക്കുക എന്നതാണ് ഈ തെരഞ്ഞെടുപ്പിന്റെ പ്രാധാന്യമെന്ന് ഡി.വൈ.എഫ്.ഐ അഖിലേന്ത്യാ പ്രസിഡന്റ് പി.എ മുഹമ്മദ് റിയാസ് പറഞ്ഞു. രാത്രി ഉറങ്ങുന്ന കോണ്‍ഗ്രസുകാര്‍ ബി.ജെ.പിയായിട്ടാണ് ഉണരുന്നത്. ഇങ്ങനെയുള്ളവര്‍ക്ക് രാജ്യത്തിന്റെ മതേതരത്വ മൂല്യം കാത്ത് സൂക്ഷിക്കാന്‍ എങ്ങനെയാണ് കഴിയുക എന്നും അദ്ദേഹം ചോദിച്ചു.

പാറമ്മല്‍ കുഞ്ഞിപ്പ അധ്യക്ഷനായി. ഐ.ബി സതീഷ് എം.എല്‍.എ, ഡി.വൈ.എഫ്.ഐ കോഴിക്കോട് ജില്ലാ പ്രസിഡന്റ് എസ്.കെ സതീഷ്, എന്‍.നിതീഷ്, കെ. വിനോദ് സംസാരിച്ചു.