പരപ്പനങ്ങാടി: പരപ്പനങ്ങാടി കടപ്പുറത്ത് നിന്നു മത്സ്യബന്ധനത്തിന് പോയ മത്സ്യത്തൊഴിലാളികള്‍ക്ക് കടലില്‍ നിന്ന് കിട്ടിയ അജ്ഞാത വസ്തു തൊഴിലാളികളെ ആശങ്കയിലാഴ്ത്തി. ഒട്ടുമ്മല്‍ കടപ്പുറത്തെ നാക്കടിയന്‍ കമ്മുക്കുട്ടി ലീഡറായ മിന്നല്‍ക്കൊടി വള്ളത്തിലെ തൊഴിലാളിയായ കുപ്പാച്ചന്‍ സിദ്ദീഖിനാണ് ഇന്നലെ ഉച്ചക്ക് പന്ത്രണ്ടോടെ അജ്ഞാത ഉപകരണം ലഭിച്ചത്.
പൊന്നാണി തീരത്ത് നിന്ന് ഏകദേശം 20 കി.മീ. അകലെ വെള്ളത്തില്‍ ഒഴുകിയെത്തുകയായിരുന്നു വസ്തു. കപ്പലുകളില്‍ തൊഴിലാളികള്‍ക്ക് പരിചരണം നല്‍കുന്നതിന് ഉപയോഗിക്കുന്ന ഉപകാരണമായിരിക്കുമെന്നാണ് തൊഴിലാളികള്‍ പറയുന്നത്.
പെട്ടിക്കുള്ളില്‍ അടക്കം ചെയ്ത ഉപകരണത്തില്‍ ഡിപ്പാര്‍ട്ട്‌മെന്റ് ഓഫ് ഹെല്‍ത്ത് യു.എസ്.എ എന്ന് രേഖപ്പെടുത്തിയിട്ടുണ്ട്. വാട്ടര്‍ ബോട്ടില്‍ മാതൃകയിലുള്ള ഉപകരണം സിദ്ദീഖ് പരപ്പനങ്ങാടി പൊലീസ് സ്റ്റേഷനില്‍ ഏല്‍പ്പിച്ചു. ഉപകരണത്തിന്റെ പടം കോസ്റ്റല്‍ ഗാര്‍ഡ് ഓഫിസിലേക്ക് അയച്ച ശേഷം ഉപകരണത്തിന്റെ വിശദ വിവരം അറിയിക്കുമെന്ന് പൊലിസ് അറിയിച്ചതായി സിദ്ദീഖ് പറഞ്ഞു.