തിരൂര്‍: ജില്ലയില്‍ അവശേഷിച്ച തിരൂര്‍ കെ.ജി പടിയിലെ ബിവറേജ് ഔട്ട്‌ലറ്റ് അടച്ചുപൂട്ടണമെന്നാവശ്യപ്പെട്ട് ജനകീയ സമരസമിതി രംഗത്ത്. സമിതിയുടെ നേതൃത്വത്തില്‍ ഔട്ട് ലെറ്റിന് മുന്നില്‍ സായാഹ്ന സംഗമം സംഘടിപ്പിച്ച സമരസമിതി ശക്തമായി മുന്നോട്ടുപോകാനാണ് തീരുമാനിച്ചിരിക്കുന്നത്. സ്ത്രീകളുള്‍പ്പടെയുള്ളവര്‍ അണിനിരന്ന സംഗമം ഔട്ട് ലെറ്റ് അടച്ചുപൂട്ടുന്നത് വരെ സമരരംഗത്ത് തുടരുമെന്ന് പ്രഖ്യാപിക്കുന്നതായിരുന്നു.
മദ്യ വിരുദ്ധ ജനകീയ മുന്നണി സംസ്ഥാന സെക്രട്ടറി ഇയ്യാച്ചേരി കുഞ്ഞിക്കൃഷ്ണന്‍ മാസ്റ്റര്‍ അടക്കമുള്ളവരുടെ പങ്കാളിത്തത്തോടെയായിരുന്നു പ്രക്ഷോഭം.
സുപ്രിം കോടതി വിധിയെ തുടര്‍ന്ന് തിരൂരിലേത് ഒഴികെ ജില്ലയിലെ മറ്റെല്ലാ വിദേശ മദ്യവില്‍പ്പനശാലകളെല്ലാം അടച്ചുപൂട്ടിയതോടെ തിരൂരിലെ ബീവറേജസ് ഔട്ട് ലെറ്റില്‍ കഴിഞ്ഞ ദിവസങ്ങളിലായി വന്‍ തിരക്കാണ് അനുഭവപ്പെടുന്നത്. തിക്കും തിരക്കും സംഘര്‍ഷവും ഗതാഗത തടസവും കാരണം പ്രശ്‌നം രൂക്ഷമായ സാഹചര്യത്തിലാണ് സമരസമിതി ശക്തമായി രംഗത്തുവന്നിരിക്കുന്നത്.