മാഡ്രിഡ്: ലാലിഗയില്‍ റയല്‍ മാഡ്രിഡ് ജയം തുടരുന്നു. ഇന്നലെ നടന്ന മത്സരത്തില്‍ ലെവന്റെയെയാണ് റയല്‍ മാഡ്രിഡ് 2-1 എന്ന സ്‌കോറിന് പരാജയപ്പെടുത്തിയത്. 43-ാം മിനിട്ടില്‍ കരീം ബെന്‍സേമയുടെ പെനാല്‍റ്റിയിലൂടെ റയല്‍ മാഡ്രിഡാണ് ആദ്യ ഗോള്‍ സ്‌കോര്‍ ചെയ്തത്. 60-ാം മിനിട്ടില്‍ റോജര്‍ മാര്‍ട്ടി ഗോള്‍ മടക്കി സമനില പിടിച്ചു. 78-ാം മിനിട്ടില്‍ ലഭിച്ച പെനാല്‍റ്റി ഗരത് ബെയ്ല്‍ ലക്ഷ്യത്തിലെത്തിച്ചതോടെ റയല്‍ വീണ്ടും ഒരു ഗോളിന്റെ ലീഡ് നേടി. 86-ാം മിനിട്ടില്‍ റയല്‍ താരം നാച്ചോ ചുവപ്പ് കാര്‍ഡ് കണ്ട് പുറത്തായി. ഗോള്‍ മടക്കാനുള്ള ശ്രമങ്ങള്‍ക്കിടെ 88-ാം മിനിട്ടില്‍ ലെവന്റെ താരം റൂബന്‍ റോച്ചിനക്ക് ചുവപ്പ് കാര്‍ഡ് ലഭിച്ചു. ജയത്തോടെ മൂന്നാം സ്ഥാനത്തുള്ള റയല്‍ മാഡ്രിഡിന് 24 മത്സരത്തില്‍ നിന്ന് 45 പോയിന്റായി. രണ്ടാം സ്ഥാനത്തുള്ള അത്‌ലറ്റിക്കോ മാഡ്രിഡിന് 50 ഉം ഒന്നാം സ്ഥാനത്തുള്ള ബാഴ്‌സലോണക്ക് 57 പോയിന്റുമാണുള്ളത്.

ഇന്റര്‍മിലാന് സമനില

റോം: സീരി എയില്‍ ഇന്റര്‍മിലാന് സമനില. ഇന്നലെ നടന്ന മത്സരത്തില്‍ ഫ്യുരന്റീനയാണ് ഇന്റര്‍മിലാനെ സമനിലയില്‍ തളച്ചത്. കളിയുടെ ഒന്നാം മിനിട്ടില്‍ തന്നെ സ്റ്റീഫനിലൂടെ ഫ്യുരന്റീന ഗോള്‍ നേടി. ആറാം മിനിട്ടില്‍ മിലാന്‍ സമനില പിടിച്ചു. 40-ാം മിനിട്ടില്‍ പൊളിറ്റിയാനോയിലൂടെ മിലാന്‍ രണ്ടാം ഗോളും നേടി. 52-ാം മിനിട്ടില്‍ ലഭിച്ച പെനാല്‍റ്റി ഇവാന്‍ പെരിസിച്ച് ലക്ഷ്യത്തിലെത്തിച്ച് രണ്ട് ഗോളിന്റെ ലീഡ് നേടി. 74, 91 മിനിട്ടുകളിലായിരുന്നു ഫ്യുരന്റീനയുടെ സമനില ഗോള്‍ പിറന്നത്. മറ്റൊരു മത്സരത്തില്‍ എതിരില്ലാത്ത നാലു ഗോളുകള്‍ക്ക് നാപോളി പാര്‍മയെ പരാജയപ്പെടുത്തി. അര്‍ക്കഡോയിസ് മിലിക്ക് നാപോളിക്ക് വേണ്ടി ഇരട്ട ഗോള്‍ സ്വന്തമാക്കി.