ന്യൂഡല്‍ഹി: ഡല്‍ഹിയില്‍ ഭീകരാക്രമണം നടത്താന്‍ തീവ്രവാദികള്‍ പദ്ധതിയിടുന്നതായി പഞ്ചാബ് പൊലിസ് രഹസ്യാന്വേഷണ വിഭാഗം മുന്നറിയിപ്പ് നല്‍കിയതിനെത്തുടര്‍ന്ന് തലസ്ഥാനത്ത് കനത്ത ജാഗ്രത. 

നുഴഞ്ഞുകയറിയ ഭീകരര്‍ ഡല്‍ഹിയിലെത്തിയിട്ടുണ്ടെന്നും രഹസ്യാന്വേഷണ വിഭാഗം മുന്നറിയിപ്പ് നല്‍കിയിട്ടുണ്ട്. ലഭിച്ച സൂചനയനുസരിച്ച് നുഴഞ്ഞുകയറിയവര്‍ സായുധരും ചാവേറുകളുമാണ്. ഭീകരര്‍ സഞ്ചരിച്ച വാഹനത്തിന്റെ നമ്പറും രഹസ്യാന്വേഷണ വിഭാഗത്തിന് ലഭിച്ചതായാണ് റിപ്പോര്‍ട്ട്.
ഇതേത്തുടര്‍ന്ന് വാഹന പരിശോധനകള്‍ കര്‍ശനമാക്കിയിട്ടുണ്ട്. അടുത്തിടെ കശ്മിരിലുണ്ടായ ഭീകരാക്രമണത്തില്‍ എട്ടു സൈനികര്‍ കൊല്ലപ്പെട്ടിരുന്നു.