ശ്രീനഗര്‍: ജമ്മു കശ്മിരില്‍ തീവ്രവാദ വിരുദ്ധസേനയിലെ ജവാനെ ഭീകരര്‍ തട്ടിക്കൊണ്ടുപോയി. പൂഞ്ച് സ്വദേശിയായ ജവാനെ പുല്‍വാമയില്‍നിന്നാണ് തട്ടിക്കൊണ്ടുപോയത്. 44 രാഷ്ട്രീയ റൈഫിള്‍സിലെ സൈനികനായ ഔറംഗസീബിനെയാണ് ഭീകരര്‍ തട്ടിക്കൊണ്ടുപോയത്. ഷോപിയാനില്‍ പോസ്റ്റ് ചെയ്തിരുന്ന ഇദ്ദേഹം അവധിക്ക് നാട്ടില്‍ പോയതായിരുന്നു. സ്വകാര്യ വാഹനത്തില്‍ സഞ്ചരിക്കുകയായിരുന്ന ഔറംഗസീബിനെ ഇന്നലെ രാവിലെ 9 മണിക്കാണ് പുല്‍വാമയില്‍വച്ച് ഭീകരര്‍ തട്ടിക്കൊണ്ടുപോയതെന്നാണ് വിവരം. ജവാനെ രക്ഷിക്കാന്‍ നടപടി ആരംഭിച്ചതായി സൈന്യം അറിയിച്ചു. റമദാന്‍ പ്രമാണിച്ച് സൈന്യം ഭീകര വിരുദ്ധ നടപടികള്‍ നിര്‍ത്തിവച്ചിരുന്നു. കഴിഞ്ഞ വര്‍ഷം സുഹൃത്തിന്റെ വിവാഹ സല്‍ക്കാരത്തില്‍ പങ്കെടുക്കാനെത്തിയ സൈനികനെ ഭീകരര്‍ തട്ടിക്കൊണ്ടുപോയി വധിച്ചിരുന്നു.