വടക്കാഞ്ചേരി: ഉത്രാളി പൂരം അഖിലേന്ത്യാ പ്രദര്‍ശന നഗരിയിലെ അമ്യൂസ്‌മെന്റ് പാര്‍ക്കില്‍ അപകടം. കപ്പും സോസറും റൈഡില്‍ കപ്പ് ഊരിത്തെറിച്ച് നാലു യുവതികള്‍ക്കു പരുക്കേറ്റു. റൈഡ് നടക്കുന്നതിനിടെ സോസര്‍ ഇളകി മാറുകയും മറിഞ്ഞു വീഴുകയുമായിരുന്നു.
കുമരനല്ലൂര്‍ ചങ്ങാലി വളപ്പില്‍ ബിന്ദു (40), ശ്രീലക്ഷ്മി (18), ശ്രുതി (22), ഭവാനി (22) എന്നിവര്‍ക്കാണ് പരുക്കേറ്റത്. റൈഡ് പെട്ടെന്ന് നിര്‍ത്തിയതിനാലാണ് വന്‍ അപകടം ഒഴിവായത്.
പ്രദര്‍ശന നഗരിയില്‍ ക്യാംപ് ചെയ്തിരുന്ന ആക്ട്‌സ് വടക്കാഞ്ചേരി യൂനിറ്റ് പ്രവര്‍ത്തകരാണ് പരുക്കേറ്റവരെ ആശുപത്രിയിലേക്ക് മാറ്റിയത്. ഡ്രൈവര്‍ പ്രസാദ്, വളണ്ടിയര്‍മാരായ മഹേഷ്, റംഷാദ്, റജീബ്, ഗിരീഷ്, ഫസല്‍, നിയാസ്, അന്‍സാര്‍, റഫീഖ് നേതൃത്വം നല്‍കി.
അപകടത്തെ തുടര്‍ന്ന് റൈഡ് നിര്‍ത്തിവച്ചു. കഴിഞ്ഞ ദിവസം നേത്ര ഊഞ്ഞാല്‍ സ്തംഭിച്ചതും പരിഭ്രാന്തി പരത്തിയിരുന്നു. അതിനിടെ പ്രദര്‍ശന നഗരിയില്‍ ആവശ്യമായ സുരക്ഷയില്ലെന്ന് ആരോപിച്ച് ഒരു വിഭാഗം യുവാക്കള്‍ രംഗത്തെത്തി. ഇതിനെ ചൊല്ലി നഗരസഭാ അധികൃതരുമായി വാക്ക് തര്‍ക്കവും ഉണ്ടായി. പൊലിസ് കസ്റ്റഡിയിലെടുത്ത യുവാക്കളെ പിന്നീട് വിട്ടയച്ചു.