വല്ലപ്പുഴ: മാര്‍ച്ച് 31ന് മുമ്പ് നികുതി പിരിച്ചെടുക്കുന്ന തന്ത്രപ്പാടില്‍ ചളവറ ഗ്രാമ പഞ്ചായത്തില്‍ 2013-14 വര്‍ഷത്തില്‍ ബാക്കിയുണ്ടെന്ന് പറയുന്ന 81 പൈസ വസ്തു നികുതിക്കും ജപ്തി നോട്ടീസ് അയച്ച് ഉദ്യോഗസ്ഥര്‍ കാര്യക്ഷമതയില്‍ എപ്ലസ് നേടി.
പഞ്ചായത്തിലെ അഞ്ചാം വാര്‍ഡിലെ താമസക്കാരന്‍ വീട്ടുനമ്പര്‍ 148 ന്റെ ഉടമസ്ഥനായ വട്ടംകണ്ടത്തില്‍ മുഹമ്മദ് ഷാ എന്ന വ്യക്തിക്കാണ് ഈ മാസം എട്ടിന് 2013-14 കാലയളവിലെ വസ്തു നികതി ഇനത്തില്‍ 81 പൈസ അടക്കാനുണ്ടെന്നു കാണിച്ച് നോട്ടീസ് അയച്ചിരിക്കുന്നത്.
2013-14 വര്‍ഷവും ശേഷമുള്ള എല്ലാ വര്‍ഷവും ഉള്‍പ്പെടെ 2016-17 വരെ വീട്ടുടമസ്ഥന്‍ യഥാസമയം വസ്തു നികുതി അടച്ച് റസീറ്റ് വാങ്ങുന്നുണ്ട്. ഈ അവസരങ്ങളിലൊന്നും 2013 ല്‍ 81 പൈസ ബാക്കിയുണ്ടന്നും ഇത് അടക്കണമെന്നും വീട്ടുടമസ്ഥനോട് ആവശ്യപ്പെട്ടിട്ടില്ല.
വസ്തു നികുതിയും അഞ്ചു രൂപ നോട്ടീസ് ചാര്‍ജും ഉള്‍പ്പെടെ അഞ്ചു രൂപ 81 പൈസ അടക്കാനാണ് നോട്ടീസില്‍ കാണിച്ചിരിക്കുന്നത്.
നോട്ടീസ് ലഭിച്ച് 15 ദിവത്തിനകം നികുതിയും, നോട്ടീസ് പടിയും, റജിസ്‌ട്രേഷന്‍ ചാര്‍ജ് ഈടാക്കാനുണ്ടങ്കില്‍ അതും കൂടി ഒടുക്കാതിരിക്കുകയോ, അപ്രകാരം ഒടുക്കാതിരിക്കുന്നതിന് സെക്രട്ടറിക്ക് ബോധ്യമാവത്തക്കവണ്ണമുള്ള കാരണം കാണിക്കാതിരിക്കുകയോ ചെയ്യാത്ത പക്ഷം ചട്ടം 15 പ്രകാരം താങ്കളുടെ ജംഗമ വസ്തുക്കള്‍ ലേലം ചെയ്ത് നികുതി, നോട്ടീസ് പടി, റജിട്രേഷന്‍ ചാര്‍ജ്, വാറന്റ് പടി ഈടാക്കുന്നതും ഏതെങ്കിലും കാരണവശാല്‍ ജപ്തി പ്രായോഗികമല്ലന്നോ മുഴുവന്‍ തുകക്കും പര്യപ്തമല്ലെന്നോ തോന്നുന്ന പക്ഷം താങ്കളെ പ്രോസിക്യൂട്ട് ചെയ്യുമെന്നും നോട്ടീസില്‍ പറയുന്നു. വസ്തു നികുതി ഒരു വര്‍ഷത്തെയും ബാക്കിയില്ലെന്ന് ഉറപ്പാണെങ്കിലും ജപ്തി നോട്ടിസ് കിട്ടിയ ഭയപ്പാടില്‍ നികുതി അടക്കാനായി പഞ്ചായത്തില്‍ എത്തിയപ്പോള്‍ ഈ സംഖ്യ അടക്കേണ്ട എന്നാണ് ജീവനക്കാര്‍ പറഞ്ഞതെന്ന് വീട്ടുടമ പറയുന്നു.
ഇത്തരത്തില്‍ തുച്ചമായ സംഖ്യക്ക് നോട്ടിസ് ലഭിച്ചവര്‍ പഞ്ചായത്തില്‍ ഏറെയാണ്. ജീവനക്കാര്‍ അല്‍പം ഉത്തരവാദിത്വം കാട്ടിയിരുന്നുവെങ്കില്‍ നോട്ടീസ് അയക്കേണ്ട അഞ്ചു രൂപ സര്‍ക്കാരിനും, നോട്ടീസ് ലഭിച്ച വ്യക്തിയുടെ സാമ്പത്തും സമയവും ലാഭിക്കാമായിരുന്നു.
അതേ സമയം മാര്‍ച്ച് 31ന് മുമ്പ് നികുതി പിരിച്ചെടുക്കുന്നതിനായി പഞ്ചായത്തിലെ മുഴുവന്‍ ആളുകളുടേയും വിവരങ്ങള്‍ ഒന്നിച്ചെടുക്കുന്നതില്‍ വരുന്ന വീഴ്ചകളാണിതെന്നാണ് സെക്രട്ടറി പറയുന്നത്.