കോഴിക്കോട്: താമരശേരി കട്ടിപ്പാറയിലെ കരിഞ്ചോര മലയിലുണ്ടായ ഉരുള്‍പൊട്ടലില്‍ മരണം എട്ടായി. ഉരുള്‍പൊട്ടലില്‍ കാണാതായ നസ്‌റത്തിന്റെ മകള്‍ ഒന്നരവയസുകാരി റിഫ ഫാത്തിമ മറിയം ആണ് മരിച്ചത്. ഇന്നലെ മരിച്ച ഹസന്റെ വീടു നിന്നിരുന്ന ഭാഗത്ത് നടത്തിയ തെരച്ചിലിലാണ് മൃതദേഹം കണ്ടെത്തിയത്.

കാണാതായ മറ്റുള്ളവര്‍ക്ക് വേണ്ടി തിരച്ചില്‍ പുരോഗമിക്കുകയാണ്. റിഫയുടെ സഹോദരിയും മാതാവുമടക്കം ആറുപേര്‍ക്കുവേണ്ടിയുള്ള തെരച്ചിലാണ് തുടരുന്നത്.

ഇന്നലെ അര്‍ധരാത്രിയോടെ പ്രതികൂല കാലാവസ്ഥയെത്തുടര്‍ന്ന്‌ നിർത്തിവെച്ച തെരച്ചില്‍ ഇന്ന് രാവിലെ ഏഴരയോടെയാണ് പുനരാരംഭിച്ചത്. കുത്തനെയുള്ള കുന്നിന്‍ പ്രദേശമായതിനാല്‍ രക്ഷാ പ്രവര്‍ത്തനം വളരെ പതുക്കെയാണ് നടക്കുന്നത്.  കൂടുതല്‍ ആളുകള്‍ മണ്ണിനടിയില്‍ കുടുങ്ങിക്കിടക്കുന്നുവെന്ന് സംശയമുണ്ട്.

രാവിലെ പ്രതിപക്ഷനേതാവ് രമേശ് ചെന്നിത്തല ദുരിതബാധിത പ്രദേശങ്ങളില്‍ സന്ദര്‍ശിച്ച് സ്ഥിതിഗതികള്‍ വിലയിരുത്തിയിരുന്നു. ദുരിതബാധിതര്‍ക്ക് പ്രത്യേക പാക്കേജ് പ്രഖ്യാപിക്കണമെന്നും അദ്ദേഹം പറഞ്ഞു.

തുടര്‍ച്ചയായ മഴയെത്തുടര്‍ന്ന് വ്യാഴാഴ്ച പുലര്‍ച്ചെ അഞ്ചരയോടെയാണ് നാടിനെ നടുക്കിയ ദുരന്തമുണ്ടായത്. കരിഞ്ചോലമലയിലെ രണ്ടിടങ്ങളില്‍ പുലര്‍ച്ചെയോടെ ഉരുള്‍പൊട്ടലുണ്ടായി.

കരിഞ്ചോല മലയുടെ താഴെ താമസിക്കുന്ന അഞ്ച് വീടുകളില്‍ നാല് വീട്ടുകാര്‍ അപകടത്തില്‍പ്പെട്ടു. കരിഞ്ചോലമലയുടെ താഴെ താമസിക്കുന്ന ഹസന്‍, അബ്ദുറഹിമാന്‍, അബ്ദുള്‍ സലീം, ഈര്‍ച്ച അബ്ദുറഹിമാന്‍, കൊടശേരിപൊയിലില്‍ പ്രസാദ് എന്നിവരുടെ വീടുകളാണ് അപകടത്തില്‍ തകര്‍ന്നത്. അപകടത്തില്‍ മരിച്ച ഏഴുപേരുടെ മൃതദേഹങ്ങള്‍ ഇന്നലെതന്നെ കണ്ടെത്തിയിരുന്നു.

വെട്ടിയൊഴിഞ്ഞതോട്ടം കരിഞ്ചോല അബ്ദുറഹിമാന്‍ (60), മകന്‍ ജാഫര്‍ (35), ജാഫറിന്റെ മകന്‍ മുഹമ്മദ് ജാസിം (അഞ്ച്), കരിഞ്ചോല അബ്ദുല്‍ സലീമിന്റെ മക്കളായ ദില്‍ന ഷെറിന്‍ (ഒന്‍പത്), മുഹമ്മദ് ഷഹബാസ് (മൂന്ന്), കരിഞ്ചോല ഹസന്‍ (65), മകള്‍ ജന്നത്ത് (17) എന്നിവരാണ് മരിച്ചത്. അബ്ദുറഹിമാന്‍, മുഹമ്മദ് ജാസിം, ദില്‍ന ഷെറിന്‍, മുഹമ്മദ് ഷഹബാസ് എന്നിവരുടെ മൃതദേഹം ഇന്നലെ ഉച്ചയോടെയും ഹസന്‍, മകള്‍ ജന്നത്ത് എന്നിവരുടെ മൃതദേഹം വൈകിട്ടോടെയും ജാഫറിന്റെ മൃതദേഹം രാത്രി ഏഴിനുമാണ് കണ്ടെടുത്തത്. ദുരന്തത്തില്‍പ്പെട്ട ഹസന്റെ വീട്ടില്‍ നോമ്പുതുറക്കായി മക്കളും മരുമക്കളുമെത്തിയതിനാലാണ് മരണ സംഖ്യ കൂടാന്‍ കാരണം.

12 പഞ്ചായത്തുകളിലായി ആയിരത്തോളം കുടുംബങ്ങളെ വിവിധ ദുരിതാശ്വാസ കാംപുകളിലും ബന്ധുവീടുകളിലുമായി മാറ്റിപ്പാര്‍പ്പിച്ചിരിക്കുകയാണ്.

കരിഞ്ചോല മലമുകളില്‍ സ്വകാര്യവ്യക്തിയുടെ നിര്‍മാണവുമായി ബന്ധപ്പെട്ട് ഉണ്ടാക്കിയ തടയണയും ജലസംഭരണിയും തകര്‍ന്നതും അപകടത്തിന്റെ ആഘാതം വര്‍ധിപ്പിച്ചതായി പരാതിയുണ്ട്.