കോട്ടയം: ഏറെ വിവാദങ്ങള്‍ക്കും പ്രതിസന്ധികള്‍ക്കുമൊടുവില്‍ ഹാദിയ ഒടുവില്‍ അവളുടെ സ്വപ്‌നം പൂര്‍ത്തീകരിച്ചിരിക്കുന്നു. ഇനി ഹാദിയ വെറും ഹാദിയയല്ല. ഡോ.ഹാദിയ അശോകനാണ്. ഹാദിയയുടെ ഭര്‍ത്താവ് ഷെഫിന്‍ ജഹാനാണ് ഹാദിയ പഠനം പൂര്‍ത്തിയാക്കി ഡോക്ടറായ വിവരം ഫേസ്ബുക്കിലൂടെ അറിയിച്ചത്.

'ഈ തിളക്കമാര്‍ന്ന വിജയം ഒരു വിശിഷ്ടമായ നേട്ടമാണ്. കാരണം അവസാനമില്ലാത്ത പ്രാര്‍ത്ഥനകള്‍ക്കു ശേഷമാണ് ഇതില്‍ എത്തിച്ചേര്‍ന്നത്. വേര്‍പിരിയലും തടവറയും സ്‌നേഹവും കരുണയും ഒക്കെ നിറഞ്ഞ കഠിനമായ പോരാട്ടത്തിനും ശേഷമാണ് ഈ വിജയം.

അല്‍ഹംദുലില്ലാഹ് ! അന്തിമമായി നീ എത്തേണ്ടിടത്ത് തന്നെ എത്തിച്ചേര്‍ന്നിരിക്കുകയാണ്.

നിന്നെ ഡോക്ടര്‍ എന്ന് അഭിസംബോധന ചെയ്യുന്നതില്‍ അഭിമാനിക്കുന്നു.

ഡോ ഹാദിയ അശോകന്‍' - ഷെഫിന്‍ ഫേസ്ബുക്കില്‍ കുറിച്ചു.

കോട്ടയം ജില്ലയിലെ വൈക്കം സ്വദേശികളായ അശോകന്റെയും പൊന്നമ്മയുടെയും മകളായ അഖില ഇസ്‌ലാം മതം സ്വീകരിച്ച് ഹാദിയ എന്ന പേര് സ്വീകരിക്കുകയായിരുന്നു. ഏറെ നാളത്തെ നിയമപോരാട്ടത്തിനും വീട്ടുതടങ്കലിനും ശേഷമാണ് ഹാദിയയ്ക്ക് ഷഫിന്‍ ജഹാനൊപ്പം ജീവിക്കാന്‍ അനുമതി ലഭിച്ചത്.