തിരുവനന്തപുരം: കൊവിഡ് വ്യാപനത്തിന്റെ പശ്ചാത്തലത്തില്‍ കുടുംബശ്രീ വഴി സര്‍ക്കാര്‍ പ്രഖ്യാപിച്ച 2,000 കോടി രൂപയുടെ വായ്പാ പദ്ധതിയായ സഹായ ഹസ്തത്തിന് ആവശ്യക്കാരേറെ. കൊവിഡ് കാരണം വരുമാനം നഷ്ടപ്പെട്ട കുടുംബശ്രീ അംഗങ്ങള്‍ക്ക് 5,000 മുതല്‍ 20,000 രൂപ വരെ വായ്പ നല്‍കുന്ന പദ്ധതിയാണിത്. 

പദ്ധതിക്ക് 74 ശതമാനം അയല്‍ക്കൂട്ട അംഗങ്ങളും ആവശ്യക്കാരായതോടെ പരിമിതമായ 2,000 കോടി രൂപ ഇവര്‍ക്ക് എങ്ങനെ വീതിക്കുമെന്ന ചിന്തയിലാണ് കുടുംബശ്രീ. സംസ്ഥാനത്താകെ 2,85,605 അയല്‍ക്കൂട്ടങ്ങളിലായി 42,45,267 പേരാണ് അംഗങ്ങളായുള്ളത്. ഇതില്‍ 31,71,412 പേരാണ് വായ്പയ്ക്ക് ഇതുവരെ ആവശ്യക്കാരായുള്ളത്. ഇത്രയും പേര്‍ക്ക് 2,000 കോടി രൂപ തുല്യമായി വീതിച്ചാല്‍ തന്നെ 6,306 രൂപയാണ് ഓരോ അംഗത്തിനും ലഭിക്കുക. എന്നാല്‍ 5,000 മുതല്‍ 20,000 രൂപ വരെ ആവശ്യക്കാര്‍ക്ക് വായ്പ നല്‍കുന്നതാണ് പദ്ധതി.

ഇതില്‍ ഉയര്‍ന്ന വായ്പാതുകയായ 20,000 രൂപയ്ക്കാണ് ആവശ്യക്കാര്‍ കൂടുതല്‍. അപേക്ഷിച്ച എല്ലാവര്‍ക്കും ശരാശരി 10,000 രൂപ വച്ചു കൊടുക്കണമെങ്കില്‍ തന്നെ 3,171 കോടിയോളം വേണം. സര്‍ക്കാര്‍ സാമ്പത്തിക പ്രതിസന്ധിയിലായതിനാല്‍ വായ്പയ്ക്കുള്ള ഫണ്ട് ഉയര്‍ത്തുന്നതു പ്രായോഗികവുമല്ല. 

ലഭിച്ച അപേക്ഷകള്‍ കൃത്യമായി വിലയിരുത്തി ആവശ്യക്കാരെ മാത്രം തിരഞ്ഞെടുക്കുകയാണ് ഏക പോംവഴി. ഇതിനായുള്ള പ്രാഥമിക ഘട്ട സൂക്ഷ്മ തിരഞ്ഞെടുപ്പ് കുടുംബശ്രീ യൂനിറ്റുകള്‍ തന്നെയായിരിക്കും നിര്‍വഹിക്കുക. വായ്പ ആവശ്യമില്ലാത്തവരോട് മാറിനില്‍ക്കാന്‍ ആവശ്യപ്പെടുകയും ചെയ്യും. ഇങ്ങനെ 2,000 കോടി രൂപ പരമാവധി ആവശ്യക്കാരിലേക്ക് എങ്ങനെ എത്തിക്കാമെന്ന ചിന്തയിലാണ് കുടുംബശ്രീ അധികൃതര്‍. 

അതേസമയം 2,975 പേര്‍ക്കായി 2.37 കോടി രൂപ വായ്പ അനുവദിച്ചു. ഇതുവരെ ബാങ്കുകളില്‍ സമര്‍പ്പിച്ച 1,16,386 അപേക്ഷകളിലാണ് ഇത്രയും പേര്‍ക്ക് വായ്പ അനുവദിച്ചത്.