കോട്ടയം : ജില്ലയിലെ കുപ്രസിദ്ധഗുണ്ടയും നിരവധി ക്രിമിനല്‍ കേസുകളില്‍ പ്രതിയുമായ അരുണ്‍ ഗോപന്‍ (ഗോപകുമാര്‍-28) ഇന്നലെ ഗുണ്ടാ വിരുദ്ധ സ്‌ക്വാഡിന്റെ പിടിയിലായി.
ജില്ലയിലെ സംഘടിതകുറ്റകൃത്യങ്ങള്‍ ഗുണ്ടാപ്രവര്‍ത്തനങ്ങള്‍ എന്നിവ അമര്‍ച്ച ചെയ്യുക എന്ന ലക്ഷ്യത്തോടെ ജില്ലാ പോലിസ് മേധാവി എന്‍. രാമചന്ദ്രന്റെ നേതൃത്വത്തില്‍ പ്രവര്‍ത്തിക്കുന്ന ഗുണ്ടാവിരുദ്ധ സ്‌ക്വാഡാണ് ഇയാളെ പിടികൂടിയത്. കൊലപാതകം, കൊലപാതകശ്രമം, തട്ടിക്കൊണ്ടുപോകല്‍, മോഷണം, ക്വൊട്ടേഷന്‍ കുറ്റകൃത്യങ്ങള്‍ തുടങ്ങി 15-ഓളം കേസുകളിലെ പ്രതിയാണ് അറസ്റ്റിലായ അരുണ്‍ ഗോപന്‍.
കേരളത്തിലെ വിവിധ ജില്ലകളിലായി നിരവധി കുറ്റകൃത്യങ്ങളില്‍ പ്രതിയായ ഇയാളെ പൊലിസ് കാലങ്ങളായി അന്വേഷിച്ചുവരികയായിരുന്നു. ഇയാളുടെ കൂട്ടാളികളെയും മറ്റും നിരന്തരമായി നിരീക്ഷിച്ചതിന്റെ അടിസ്ഥാനത്തിലാണ് പിടികൂടാനായത്. അരുണ്‍ ഗോപന്റെ അറസ്റ്റ് അന്വേഷണം വഴിമുട്ടി നില്‍ക്കുന്ന പല കേസുകളിലും നിര്‍ണ്ണായകവഴിത്തിരിവ് കാരണമാകുമെന്നാണ് പൊലിസ് പ്രതീക്ഷിക്കുന്നത്. ജില്ലാ പോലിസ് മേധാവി നേതൃത്വം നല്‍കിയ സംഘത്തില്‍ കോട്ടയം ഡി.വൈ.എസ്.പി ഗിരീഷ്.പി.സാരഥി, കോട്ടയം ഈസ്റ്റ് സി.ഐ അനീഷ്.പി.കോര, സബ് ഇന്‍സ്‌പെക്ടര്‍ യു.ശ്രീജിത്ത്, ഷാഡോ പോലിസ് അംഗങ്ങളായ ബിജുമോന്‍ നായര്‍, ഷിബുക്കുട്ടന്‍, അജിത് , സജികുമാര്‍ എന്നിവര്‍ അംഗങ്ങളായിരുന്നു.