കോഴിക്കോട്: ദക്ഷിണേന്ത്യയിലെ പ്രമുഖ തീര്‍ഥാടന കേന്ദ്രമായ മടവൂര്‍ സി.എം മഖാം ശരീഫിലെ ഇരുപത്തിയെട്ടാം ഉറൂസ് മുബാറക് നാളെ മുതല്‍ 23 വരെ നടക്കുമെന്ന് സംഘാടകര്‍ വാര്‍ത്താസമ്മേളനത്തില്‍ അറിയിച്ചു. നാളെ രാവിലെ 9.30ന് സമസ്ത പ്രസിഡണ്ട് സയ്യിദ് മുഹമ്മദ് ജിഫ്രി മുത്തുക്കോയ തങ്ങളുടെ നേതൃത്വത്തില്‍ നടക്കുന്ന മഖാം സിയാറത്തോടെയാണ് ഉറൂസ് മുബാറക്കിന് തുടക്കമാകുക.
തുടര്‍ന്ന് സ്വാഗതസംഘം ചെയര്‍മാന്‍ സി.എം. കുഞ്ഞിമാഹിന്‍ മുസ്‌ലിയാര്‍ പതാക ഉയര്‍ത്തും. 10.15 ന് നടക്കുന്ന ഓത്തിടല്‍, മൗലിദ് സദസ്സിന് ഒളവണ്ണ അബൂബക്കര്‍ ദാരിമി, അബ്ദുല്ല മുസ്‌ലിയാര്‍ നേതൃത്വം നല്‍കും.
18 ന് രാവിലെ 10 ന് നടക്കുന്ന ഹജ്ജ് പഠന ക്ലാസ് കോഴിക്കോട് ഖാസി സയ്യിദ് മുഹമ്മദ്‌കോയ തങ്ങള്‍ ജമലുല്ലൈലി ഉദ്ഘാടനം ചെയ്യും. വില്ല്യാപ്പള്ളി ഇബ്രാഹിം മുസ്‌ലിയാര്‍ ക്ലാസിന് നേതൃത്വം നല്‍കും. എം.കെ. രാഘവന്‍ എം.പി മുഖ്യാതിഥിയാകും. വൈകിട്ട് 7 ന് നടക്കുന്ന അനുസ്മരണ സമ്മേളനവും മജ്‌ലിസുന്നൂറും കെ.പി. മാമു ഹാജിയുടെ അധ്യക്ഷതയില്‍ സയ്യിദ് നാസര്‍ ഹയ്യ് ശിഹാബ് തങ്ങള്‍ ഉദ്ഘാടനം ചെയ്യും. മാണിയൂര്‍ അഹമ്മദ് മുസ്‌ലിയാര്‍ മജ്‌ലിസുന്നൂറിന് നേതൃത്വം നല്‍കും. അബ്ദുല്‍ മജീദ് ബാഖവി അനുസ്മരണ പ്രഭാഷണം നടത്തും. 19 ന് രാത്രി 8 ന് നടക്കുന്ന മതപ്രഭാഷണ വേദി സയ്യിദ് അത്വാഉല്ല തങ്ങള്‍ മഞ്ചേശ്വരം ഉദ്ഘാടനം ചെയ്യും. അബ്ദുസ്സമദ് പൂക്കോട്ടൂര്‍ പ്രഭാഷണം നടത്തും. 20 ന് രാത്രി 8 മണിക്ക് സയ്യിദ് മുബഷിര്‍ തങ്ങള്‍ ജമലുല്ലൈലി ഉദ്ഘാടനം ചെയ്യും. അഷ്‌റഫ് റഹ്മാനി പ്രഭാഷണം നടത്തും.
21 ന് ജാമിഅ അശ്അരിയ്യ സദന് ദാന സമ്മേളനം നടക്കും. പ്രഥമ സെഷനില്‍ ഹമീദലി ശിഹാബ് തങ്ങള്‍ ഉദ്ഘാടനം നിര്‍വഹിക്കും. നാസര്‍ ഫൈസി കൂടത്തായ് മുഖ്യ പ്രഭാഷണം നടത്തും. ഐ.എ.എസ് സെലക്ഷന്‍ നേടിയ ഷാഹിദ് തിരുവള്ളൂരിനെ ആദരിക്കും. 10ന് നടക്കുന്ന രണ്ടാം സെഷന്‍ മുസ്തഫ മാസ്റ്റര്‍ ഉദ്ഘാടനം ചെയ്യും. ഡോ. സുബൈര്‍ ഹുദവി, ഉമറുല്‍ ഫാറൂഖ് അശ്അരി പ്രഭാഷണം നടത്തും.
ഉച്ചക്ക് ആരംഭിക്കുന്ന സെമിനാറില്‍ ഓണംപിള്ളി മുഹമ്മദ് ഫൈസി, കെ.എം. ഷാജി എം.എല്‍.എ, എ. സജീവന്‍ സംബന്ധിക്കും. അബൂബക്കര്‍ ഫൈസി മോഡറേറ്ററാകും. വൈകിട്ട് 4 മണിക്ക് അശ്അരി സംഗമവും 7 മണിക്ക് സ്വലാത്ത് മജ്‌ലിസും നടക്കും. സനദ് ദാന സമ്മേളനം സയ്യിദ് മുഹമ്മദ് ജിഫ്‌രി മുത്തുക്കോയ തങ്ങളുടെ അധ്യക്ഷതയില്‍ പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും. എം.ടി. അബ്ദുല്ല മുസ്‌ലിയാര്‍ സനദ്ദാന പ്രഭാഷണവും പി.കെ.പി. അബ്ദുസ്സലാം മുസ്‌ലിയാര്‍ മുഖ്യ പ്രഭാഷണവും നടത്തും. പി.കെ. കുഞ്ഞാലിക്കുട്ടി എം.പി, സത്താര്‍ പന്തലൂര്‍ സംബന്ധിക്കും.
ജൂണ്‍ 22 ന് വൈകിട്ട് 7 മണിക്ക് നടക്കുന്ന ദിക്‌റ് ദുആ സമ്മേളനം പ്രൊഫ. കെ. ആലിക്കുട്ടി മുസ്‌ലിയ്യാരുടെ അധ്യക്ഷതയില്‍ സ്വാദിഖലി ശിഹാബ് തങ്ങള്‍ ഉദ്ഘാടനം ചെയ്യും. എന്‍.പി.എം സൈനുല്‍ ആബിദീന്‍ തങ്ങള്‍, അത്തിപ്പറ്റ മുഹ്‌യിദ്ദീന്‍കുട്ടി മുസ്‌ലിയാര്‍, കൊയ്യോട് ഉമര്‍ മുസ്‌ലിയാര്‍, വാവാട് പി.കെ. കുഞ്ഞിക്കോയ മുസ്‌ലിയാര്‍ തുടങ്ങിയവര്‍ നേതൃത്വം നല്‍കുന്ന ചടങ്ങില്‍പ്രമുഖര്‍ പങ്കെടുക്കും. 23ന് രാവിലെ മുതല്‍ വൈകിട്ട് വരെ നടക്കുന്ന അന്നദാനത്തോടെ ഉറൂസ് മുബാറകിന് സമാപനം കുറിക്കും.
സ്വാഗതസംഘം ജനറല്‍ കണ്‍വീനര്‍ ഫൈസല്‍ ഫൈസി മടവൂര്‍, സി.എം. മഖാം മഹല്ല് പ്രസിഡന്റെ മൂത്താട്ട് അബ്ദുറഹിമാന്‍ മാസ്റ്റര്‍, പ്രോഗ്രാം കമ്മിറ്റി ചെയര്‍മാന്‍ ടി.പി.സി. മുഹമ്മദ്‌കോയ ഫൈസി, സ്വാഗതസംഘം കണ്‍വീനര്‍ എ.പി നാസര്‍ മാസ്റ്റര്‍, മീഡിയ കണ്‍വീനര്‍ പി.എം. മൊയ്തീന്‍കോയ മായനാട് വാര്‍ത്താസമ്മേളനത്തില്‍ സംബന്ധിച്ചു.