വരന്തരപ്പിള്ളി: വരന്തരപ്പിള്ളിയില്‍ ആകാശത്തു നിന്ന് ഭൂമിയില്‍ ഇരുമ്പു പൈപ്പുകള്‍ വീണെന്നു പറയപ്പെടുന്നത് ആശങ്കയ്ക്കിടയാക്കുന്നു. 

വരന്തരപ്പിള്ളി പൗണ്ടില്‍ ഞായറാഴ്ച രാവിലെ പത്തുമണിയോടെയാണ് ഇരുമ്പു പൈപ്പുകള്‍ ആകാശത്തു നിന്ന് വീണതായി പറയപ്പെടുന്നത്. രണ്ടിടങ്ങിളിലായി ഒന്നര മീറ്റര്‍ നീളത്തില്‍ ഇരുഭാഗങ്ങളിലും കോണ്‍ക്രീറ്റ് മിശ്രിതം കൊണ്ടു മൂടിയ നിലയിലുള്ള രണ്ടു പൈപ്പുകളാണ് വീണത്. വഴിയരികില്‍ നിര്‍ത്തിയിട്ടിരുന്ന പയ്യപ്പിള്ളി മേജോന്റെ കാറിലാണ് ഒന്നു വീണത്. കാറിനു കേടുപാടുകള്‍ സംഭവിച്ചു.

പൈപ്പ് വീഴുന്നതു കണ്ട് സമീപത്തു നിന്നിരുന്ന ഓട്ടോറിക്ഷ ഡ്രൈവര്‍ സന്തോഷ് ഓടിമാറിയതുമൂലം പരുക്കേല്‍ക്കാതെ രക്ഷപ്പെട്ടു അര കിലോമീറ്റര്‍ മാറി ഒരു വീടിന്റെ മുറ്റത്തും സമാനമായ പൈപ്പ് വീണു. അരോദ ഷൈജുവിന്റെ പറമ്പിലെ മാവില്‍ തട്ടി വീടിനു മുകളിലൂടെയാണ് സമീപവാസി കൊടുമ്പിലായിപ്പറമ്പില്‍ മിജോന്റെ വീട്ടുമുറ്റത്ത് പൈപ്പ് വീണത്. 

വലിയ ശബ്ദത്തോടെയാണ് പൈപ്പ് വീണതെന്ന് വീട്ടുകാര്‍ പറയുന്നു. നിലത്തു വീണ പൈപ്പില്‍ പിടിച്ച മിജോന്റെ മകന്‍ ഡെറിക്കിനു പൊള്ളലേറ്റു. വരന്തരപ്പിള്ളി പൊലിസ് സ്ഥലത്തെത്തി രണ്ട് പൈപ്പുകളും സ്റ്റേഷനിലേക്കു മാറ്റി. പൈപ്പുകള്‍ ഫൊറന്‍സിക് ഉള്‍പ്പെടെയുള്ള ശാസ്ത്രീയ പരിശോധനയ്ക്കു വിധേയമാക്കുമെന്ന് വരന്തരപ്പിള്ളി എസ്.എച്ച്.ഒ എസ്. ജയകൃഷ്ണന്‍ അറിയിച്ചു.