നിലമ്പൂര്‍: ട്രെയിനില്‍ വച്ച് ആണ്‍കുട്ടികളോട് മോശമായി പെരുമാറിയ റിട്ട. ബ്ലോക്ക് ഡെവലപ്‌മെന്റ് ഓഫിസറെ പൊലിസ് അറസ്റ്റ് ചെയ്തു. നിലമ്പൂര്‍ തൊണ്ടിയിലെ കളംക്കുന്ന് ഹരിദാസനെ(57)യാണ് നിലമ്പൂര്‍ സി.ഐ കെ.എം ദേവസ്യയും സംഘവും അറസ്റ്റ് ചെയ്തത്.
കുട്ടികള്‍ക്കെതിരായ ലൈംഗിക അതിക്രമം തടയല്‍ (പോക്‌സോ) നിയമമനുസരിച്ചാണ് അറസ്റ്റ്. ഷൊര്‍ണൂരില്‍ നിന്നും നിലമ്പൂരിലേക്ക് വരികയായിരുന്ന പാസഞ്ചറില്‍ വച്ച് പതിമൂന്ന് വയസുള്ള രണ്ട് ആണ്‍കുട്ടികളോട് കഴിഞ്ഞ ദിവസം മോശമായി പെരുമാറിയതായാണ് പരാതി. നിലമ്പൂര്‍ റെയില്‍വേ സ്‌റ്റേഷനില്‍ കാത്തുനിന്ന രക്ഷിതാക്കളെ കുട്ടികള്‍ ഫോണില്‍ വിവരം അറിയിക്കുകയായിരുന്നു. ബോഗിയില്‍ നിന്നും ഇറങ്ങുന്നതിനിടെ റെയില്‍വേ സംരക്ഷണ സേന പിടികൂടി നിലമ്പൂര്‍ പൊലിസിന് കൈമാറുകയായിരുന്നു. നിലമ്പൂര്‍ കോടതി റിമാന്‍ഡ് ചെയ്തു.