മാഡ്രിഡ്: ഇറ്റലിയും മാള്‍ട്ടയും തിരിച്ചയച്ച അഭയാര്‍ഥികളെ സ്‌പെയിന്‍ സ്വീകരിച്ചു. മധ്യാധരണ്യാഴിയില്‍ കപ്പലില്‍ കുടുങ്ങിക്കിടന്ന 933 അഭയാര്‍ഥികളാണ് സ്‌പെയിനിലെത്തിയിരിക്കുന്നത്. കപ്പലില്‍ നാല് മൃതദേഹങ്ങളുമുണ്ടായിരുന്നു.
കഴിഞ്ഞയാഴ്ചയാണ് ജിബ്രാള്‍ട്ടര്‍ കടലിടുക്കിലും വടക്കന്‍ മൊറോക്കോക്കും ദക്ഷിണ സ്‌പെയനിനുമിടയില്‍ വിവിധ ബോട്ടുകളിലായി ആയിരത്തോളം അഭയാര്‍ഥികള്‍ കുടുങ്ങിയത്. അതീവ ഗുരുതരാവസ്ഥയിലായിരുന്ന ഇവരെ 'ഡോക്ടേഴ്‌സ് വിത്തൗട്ട് ബോര്‍ഡറി'ന്റെ അക്വാറിയസ് കപ്പലെത്തിയാണു രക്ഷിച്ചത്.
എന്നാല്‍, തൊട്ടടുത്തുള്ള ഇറ്റലിയിലും മാള്‍ട്ടയിലും കപ്പല്‍ നങ്കൂരമിടാന്‍ ശ്രമിച്ചെങ്കിലും ഇരുരാജ്യങ്ങളും വിസമ്മതിച്ചു. തുടര്‍ന്ന് യു.എന്‍, ഇ.യു അടക്കം വിവിധ രാജ്യാന്തര സമിതികളും രാജ്യങ്ങളും ഇടപെട്ടിട്ടും ഇറ്റലിയും മാള്‍ട്ടയും വഴങ്ങിയില്ല. തുടര്‍ന്നാണ് ഇവരെ സ്വീകരിക്കാന്‍ സ്‌പെയിന്‍ തയാറായത്.