ലണ്ടന്‍: മുന്‍ ശ്രീലങ്കന്‍ ക്രിക്കറ്റ് ടീം ക്യാപ്റ്റന്‍ സനത് ജയസൂര്യക്ക് ഐ.സി.സി രണ്ട് വര്‍ഷത്തേക്ക് വിലക്കേര്‍പ്പെടുത്തി. ഐ.സി.സിയുടെ അഴിമതി വിരുദ്ധ ചട്ടം ലംഘിച്ചതിനാണ് താരത്തെ രണ്ട് വര്‍ഷത്തേക്ക് വിലക്കിയത്. ക്രിക്കറ്റുമായി ബന്ധപ്പെട്ടുള്ള ഒരു കാര്യത്തിലും താരത്തിന് ഈ സമയത്ത് ഇടപെടാന്‍ സാധിക്കില്ല.

അഴിമതി സംബന്ധിച്ചുള്ള അന്വേഷണവുമായി സഹകരിക്കാതിരിക്കുക, അന്വേഷണത്തിന് തടസം സൃഷ്ടിക്കുക, തെളിവു നശിപ്പിക്കാന്‍ കൂട്ടുനില്‍ക്കുക തുടങ്ങിയ കാര്യങ്ങള്‍ക്കുള്ള ഐ.സി.സിയുടെ അഴിമതി വിരുദ്ധ ചട്ടങ്ങള്‍ അനുസരിച്ച് ജയസൂര്യ കുറ്റക്കാരനാണെന്ന് കണ്ടെത്തുകയായിരുന്നു. അഴിമതി ആരോപണം നേരിടുന്ന ശ്രീലങ്കന്‍ ക്രിക്കറ്റില്‍ ഐ.സി.സിയുടെ നടപടി നേരിടുന്ന രണ്ടാമത്തെ താരമാണ് ജയസൂര്യ. 445 ഏകദിനങ്ങളില്‍ ശ്രീലങ്കക്ക് വേണ്ടി കളിച്ച താരം 21 സെഞ്ചുറിയും 323 വിക്കറ്റും നേടിയിട്ടുണ്ട്. 2011ലാണ് താരം ക്രിക്കറ്റില്‍നിന്ന് വിരമിച്ചത്.