തിരുവനന്തപുരം: അണ്ടര്‍ 19 രണ്ടാം ചതുര്‍ദിനത്തിലെ ആദ്യ ഇന്നിങ്‌സില്‍ ദക്ഷിണാഫ്രിക്കയ്ക്ക് ബാറ്റിങ് തകര്‍ച്ച. ഇന്ത്യക്കെതിരേ ടോസ് നേടി ബാറ്റിങ് തിരഞ്ഞെടുത്ത ദക്ഷിണാഫ്രിക്ക 152 റണ്‍സിന് ആദ്യ ഇന്നിങ്‌സിസില്‍ എല്ലാവരും പുറത്തായി. മറുപടി ബാറ്റിങ്ങിനിറങ്ങിയ ഇന്ത്യ രണ്ട് വിക്കറ്റ് നഷ്ടത്തില്‍ 112 എന്ന നിലയിലാണ്. ഓപ്പണര്‍ ദിവ്യാന്‍ശ് സക്‌സേന (രണ്ട്) മലയാളി താരം വത്സല്‍ ഗോവിന്ദ് (25) എന്നിവരുടെ വിക്കറ്റുകളാണ് ഇന്ത്യക്ക് നഷ്ടമായത്.

ഏകദിന ശൈലിയില്‍ ബാറ്റ് വീശിയ ഓപ്പണര്‍ യശ്വസി ജയ്‌സ്വാളിന്റെ (81*) അര്‍ധസെഞ്ചുറിയാണ് ഇന്ത്യന്‍ ഇന്നിങ്‌സിന് കരുത്തായത്. മലയാളി താരം വരുണ്‍ നായനാറിന് പകരമാണ് ജയ്‌സ്വാള്‍ ടീമില്‍ ഇടംപിടിച്ചത്. ടോസ് നേടിയ ദക്ഷിണാഫ്രിക്കന്‍ ക്യാപ്റ്റന്‍ മാത്യു മോഡ്‌ഗോമെറി ബാറ്റിങ് തിരഞ്ഞെടുക്കുകയായിരുന്നു.
എന്നാല്‍ ഓപ്പണര്‍ റുവാന്‍ ടെര്‍ബ്ലഞ്ചെ (51), ബ്രയിസ് പാര്‍സണ്‍സ് (64) എന്നിവര്‍ ഒഴികെ ആര്‍ക്കും ഇന്ത്യന്‍ ബൗളിങ് നിരക്ക് മുന്നില്‍ പിടിച്ചു നില്‍ക്കാന്‍ ആയില്ല. ദക്ഷിണാഫ്രിക്കന്‍ നിരയില്‍ എട്ട് പേര്‍ക്ക് രണ്ടക്കം കടക്കാനായില്ല. ഇന്ത്യക്കായി മാനിഷി 17.4 ഓവറില്‍ 58 റണ്‍സ് വഴങ്ങി അഞ്ച് വിക്കറ്റെടുത്തു. ഹൃത്വിക് ഷൊകീന്‍ രണ്ട് വിക്കറ്റ് വീഴ്ത്തി.