കാബൂള്‍: കിഴക്കന്‍ പ്രവിശ്യയായ നംഗര്‍ഹാറില്‍ താലിബാന്‍ നേതാക്കളും സര്‍ക്കാര്‍ വൃത്തങ്ങളും പങ്കെടുത്ത സംഗമത്തിനുനേരെ ചാവേര്‍ സ്‌ഫോടനം. സംഭവത്തില്‍ 23 പേര്‍ കൊല്ലപ്പെട്ടതായി നംഗര്‍ഹാര്‍ പ്രവിശ്യാ ഭരണകൂടം വക്താവ് അത്താഉല്ല കൊഗ്‌യാനി അറിയിച്ചു. ആക്രമണത്തിന്റെ ഉത്തരവാദിത്തം ഐ.എസ് ഏറ്റെടുത്തിട്ടുണ്ട്. വെടിനിര്‍ത്തല്‍ പ്രഖ്യാപനത്തിനു ശേഷം ഐ.എസ് നടത്തുന്ന രണ്ടാമത്തെ ആക്രമണമാണിത്.
അതിനിടെ, യു.എസ് ഡ്രോണ്‍ ആക്രമണത്തില്‍ പാകിസ്താന്‍ താലിബാന്‍ കമാന്‍ഡര്‍ മൗലാനാ ഫസ്‌ലുല്ല കൊല്ലപ്പെട്ടതായും റിപ്പോര്‍ട്ടുണ്ട്. ഇക്കാര്യം അശ്‌റഫ് ഗനി നേരിട്ടു സ്ഥിരീകരിക്കുകയും ചെയ്തിട്ടുണ്ട്. പാകിസ്താന്റെ പിടികിട്ടാപുള്ളികളില്‍ പ്രധാനിയാണ് ഫസ്‌ലുല്ല.