ജമ്മു കശ്മീര്‍: കശ്മീരിന്റെ വിവിധ മേഖലകളില്‍ സൈനിക ഏറ്റുമുട്ടല്‍ തുടരുകയാണ്. കഴിഞ്ഞ ഒരാഴ്ചയ്ക്കിടെ ഒന്‍പത് ഭീകരരെ വധിച്ചതായി സൈന്യം അറിയിച്ചു. തിങ്കളാഴ്ച രാവിലെ കുല്‍ഗാമിന് അടുത്ത് നടന്ന സംയുക്ത സൈനിക നീക്കത്തില്‍ മൂന്ന് ഭീകരരെ വധിച്ചതായി ഉദ്ധംപൂരിലെ പ്രതിരോധവകുപ്പ് പി.ആര്‍.ഒ അറിയിച്ചു.

കഴിഞ്ഞ ഒരാഴ്ചയ്ക്കിടെ കുല്‍ഗാമില്‍ നടക്കുന്ന നാലാമത്തെ സൈനിക നീക്കമാണിതെന്ന് റഷ്യന്‍ വാര്‍ത്താ ഏജന്‍സി സ്പുടിനിക് റിപ്പോര്‍ട്ട് ചെയ്യുന്നു.

കുല്‍ഗാമില്‍ സൈന്യം നടത്തിയ തെരച്ചിലിന് ഇടയ്ക്ക് ഭീകരവാദികള്‍ വെടിയുതിര്‍ക്കുകയായിരുന്നു. സുരക്ഷാസേനയ്ക്ക് വെടിയേറ്റിട്ടില്ലെന്ന് പി.ആര്‍.ഒ മാധ്യമങ്ങളോട് വിശദീകരിച്ചു. ഏപ്രില്‍ 24,25 തീയതികളില്‍ അനന്ത്‌നാഗ്, പുല്‍വാമ മേഖലകളില്‍ സമാനമായ സൈനിക നീക്കത്തില്‍ നാല് ഭീകരവാദികളെ വധിച്ചു. ഏപ്രില്‍ 26ന് രാത്രിയാണ് 2 ഭീകരരെക്കൂടി വധിച്ചതായി സൈന്യം സ്ഥിരീകരിച്ചത്.