താമരശേരി: കട്ടിപ്പാറ കരിഞ്ചോലയില്‍ ഉരുള്‍പൊട്ടല്‍ സംഭവിച്ചതു മുതല്‍ ഈ കുടുംബത്തിനു വിശ്രമമില്ല. പൂനൂരിലെ പാലയുള്ളതില്‍ കൃഷ്ണദാസും ഭാര്യ ശൈലജയുമാണ് അവിശ്രമം സേവനപ്രവര്‍ത്തനങ്ങളിലേര്‍പ്പെട്ടു കൊണ്ടിരിക്കുന്നത്.
വ്യാഴാഴ്ച രാവിലെ മുതല്‍ ഓട്ടോറിക്ഷാ തൊഴിലാളിയായ കൃഷ്ണദാസ് മണ്ണുനീക്കല്‍ ജോലിയിലേര്‍പ്പെട്ടപ്പോള്‍ അതേസമയം തന്നെ രക്ഷാപ്രവര്‍ത്തനത്തിലേര്‍പ്പെട്ടവര്‍ക്കും ഉദ്യോഗസ്ഥര്‍ക്കും ഭക്ഷണമൊരുക്കുകയായിരുന്നു ഭാര്യ ശൈലജ. ഇതിനുള്ള സ്റ്റൗ ഉള്‍പ്പെടെയുള്ള എല്ലാവിധ ഒരുക്കങ്ങളോടും കൂടിയായിരുന്നു ഈ ദമ്പതികള്‍ ദുരന്തമുഖത്ത് എത്തിയിരുന്നത്.
ടാര്‍പോളിന്‍ ഷീറ്റുകൊണ്ട് മേല്‍ക്കൂര തീര്‍ത്ത് അതിനു താഴെയായിരുന്നു ഇവര്‍ ഭക്ഷണമൊരുക്കിയത്. കൂടെ നാട്ടുകാരും സഹായത്തിനുണ്ടായിരുന്നു. ശനിയാഴ്ച ഓട്ടോറിക്ഷയില്‍ വിവിധ ഭാഗങ്ങളില്‍ സേവനമനുഷ്ഠിച്ചു കൊണ്ടിരിക്കുന്ന ഉദ്യോഗസ്ഥര്‍ക്കും രക്ഷാ പ്രവര്‍ത്തകര്‍ക്കും തന്റെ ഓട്ടോറിക്ഷയില്‍ ഭക്ഷണമെത്തിക്കുന്ന ജോലിയിലായിരുന്നു കൃഷ്ണദാസ്.
ഇത്തരം ദുരന്തങ്ങള്‍ കേട്ടാല്‍ വീട്ടിലിരിക്കാന്‍ മനസ് അനുവദിക്കുന്നില്ലെന്നായിരുന്നു ഇവരുടെ പ്രതികരണം.