വേങ്ങര: കഴിഞ്ഞ ദിവസങ്ങളിലുണ്ടായ ശക്തമായ കാറ്റിലും മഴയിലും പറപ്പൂരില്‍ വന്‍ കൃഷിനാശം. 25 ഹെക്ടര്‍ കൃഷി നശിച്ചതായി കൃഷിഭവന്‍ അധികൃതര്‍ പറഞ്ഞു. കിഴക്കേ ഇരിങ്ങല്ലൂര്‍, പടിഞ്ഞാറെ ഇരിങ്ങല്ലൂര്‍, പറപ്പൂര്‍ പാടശേഖരം എന്നിവിടങ്ങളിലാണ് വന്‍ കൃഷിനാശം. കപ്പ, വാഴ, നെല്ല്, പച്ചക്കറി എന്നിവയാണ് വ്യാപകമായി നശിച്ചത്. കടലുണ്ടിപ്പുഴ കരകവിഞ്ഞ് പാടശേഖരങ്ങളിലേക്ക് വെള്ളം കയറിയതാണ് കൃഷിനാശത്തിനു കാരണം. പുഴച്ചാല്‍ ഭാഗങ്ങളിലാണ് കൂടുതല്‍ നാശനഷ്ടമുണ്ടായത്. പുഴച്ചാലില്‍ മാത്രം പത്ത് എക്കര്‍ പൂളയും വാഴയും നശിച്ചു. പഴമഠത്തില്‍ ചേന്നു, കൊമ്പന്‍ കുഞ്ഞീതു, പി.ടി മൊയ്തീന്‍ ഹാജി, കന്നിപ്പറമ്പന്‍ ഖാസിം, പെരിക്കാത്ര അനൂബ്, പഴമഠത്തില്‍ സുമേഷ്, ഉണ്ണി പെരിക്കാത്ര, അയ്യപ്പന്‍ പഴമഠത്തില്‍, ചെമ്പയില്‍ ബാലന്‍, ചിറയില്‍ അയ്യപ്പന്‍, ഇ.കെ കുഞ്ഞിമുഹമ്മദ്, ചിറയില്‍ കുഞ്ഞിക്കേലു, തട്ടാഞ്ചേരി ശംസു, എന്നിവരുടെ 10 ഏക്കറിലെ കപ്പയും പഴമീത്തില്‍ ബാലന്‍, കെ സെയ്തലി, സി.കുഞ്ഞിക്കേലു, ചിറയില്‍ അയ്യപ്പന്‍, ചെമ്പയില്‍ ബാലന്‍ എന്നിവരുടെ വാഴയുമാണ് നശിച്ചത്.