ഫറോക്ക്: അമിത വേഗതയില്‍ സഞ്ചരിച്ച ടാക്‌സി കാറിടിച്ച് സ്‌കൂട്ടര്‍ യാത്രികക്ക് ഗുരുതര പരുക്ക്. ഫറോക്ക് നഗരസഭ വികസന കാര്യ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ സബിന മന്‍സൂര്‍ (35) നാണ് പരുക്കേറ്റത്.
ഇവരെ കോഴിക്കോട്ടെ സ്വകാര്യ ആശുപത്രിയില്‍ അടിയന്തര ശസ്ത്രക്രിയക്ക് വിധേയമാക്കി. ദേശിയ പാതയില്‍ ഫറോക്ക് ചുങ്കത്ത് വില്‍പന നികുതി ചെക്ക് പോസ്റ്റിന് സമീപം ഇന്നലെ വൈകിട്ടാണ് അപകടം. കാര്‍ അമിത വേഗതയിലായിരുന്നെന്ന് ദൃക്‌സാക്ഷികള്‍ പറഞ്ഞു. തലക്ക് ഗുരുതര പരുക്കേറ്റ ഇവര്‍ അപകട നില തരണം ചെയ്തിട്ടില്ല.