ഇതര സംസ്ഥാനത്ത് കുടുങ്ങിയവരെ
തിരിച്ച് കൊണ്ടുവരല്‍: രജിസ്‌ട്രേഷന്‍
നാളെ തുടങ്ങും

തിരുവനന്തപുരം: ഇതര സംസ്ഥാനങ്ങളില്‍ കുടുങ്ങിയ മലയാളികളെ തിരിച്ചുകൊണ്ടുവരുന്നതിനുള്ള നോര്‍ക്കയുടെ രജിസ്‌ട്രേഷന്‍ നടപടികള്‍ നാളെ ആരംഭിക്കുമെന്ന് മുഖ്യമന്ത്രി പിണറായി വിജയന്‍ അറിയിച്ചു.
ലോക്ക് ഡൗണിനെ തുടര്‍ന്ന് മറ്റു സംസ്ഥാനങ്ങളില്‍ കുടുങ്ങിക്കിടക്കുന്ന മലയാളികളെ തിരിച്ചുകൊണ്ടുവരുന്നതിനായി ഏര്‍പ്പെടുത്തുന്ന ക്രമീകരണങ്ങളുമായി സഹകരിക്കണം.
ഇതര സംസ്ഥാനങ്ങളില്‍ ചികിത്സാ ആവശ്യത്തിന് പോയവര്‍, ചികിത്സ കഴിഞ്ഞവര്‍, സംസ്ഥാനത്ത് വിദഗ്ധ ചികിത്സയ്ക്ക് രജിസ്റ്റര്‍ ചെയ്ത് തിയതി നിശ്ചയിച്ച മറ്റു സംസ്ഥാനങ്ങളിലെ താമസക്കാര്‍, പഠനാവശ്യത്തിന് പോയി പഠനം പൂര്‍ത്തീകരിച്ചവര്‍, പരീക്ഷ, ഇന്റര്‍വ്യൂ എന്നിവയ്ക്കായി പോയവര്‍, തീര്‍ഥാടനം, വിനോദയാത്ര, ബന്ധുഗൃഹ സന്ദര്‍ശനം എന്നിവയ്ക്ക് പോയി കുടുങ്ങിപ്പോയവര്‍, ലോക്ക് ഡൗണ്‍ മൂലം അടച്ച വിദ്യാഭ്യാസ സ്ഥാപനങ്ങളിലെ മലയാളി വിദ്യാര്‍ഥികള്‍, ജോലി നഷ്ടപ്പെട്ടത് കൊണ്ടോ റിട്ടയര്‍ ചെയ്തതിനാലോ നാട്ടിലേക്ക് വരേണ്ടവര്‍, കൃഷിപ്പണിക്ക് പോയവര്‍ എന്നിവരെ തിരിച്ചെത്തിക്കുന്നതിനാണ് പ്രഥമ പരിഗണന നല്‍കുക.
ഇങ്ങനെ പ്രയാസപ്പെടുന്ന മുഴുവന്‍പേരെയും ഘട്ടംഘട്ടമായി തിരിച്ചുകൊണ്ടുവരും. ഇതിനുള്ള പദ്ധതി തയാറാക്കാന്‍ കലക്ടര്‍മാരോട് നിര്‍ദേശിച്ചിട്ടുണ്ടെന്നും മുഖ്യമന്ത്രി പറഞ്ഞു.