തിരുവനന്തപുരം: പ്രധാനമന്ത്രി കിസാന്‍ സമ്മാന്‍ നിധി പദ്ധതി സംബന്ധിച്ച് സമൂഹമാധ്യമങ്ങളില്‍ വ്യാജ പ്രചാരണം നടക്കുന്നതായി കൃഷിമന്ത്രി വി. എസ് സുനില്‍കുമാര്‍. കൃഷിവകുപ്പ് ഉദ്യോഗസ്ഥര്‍ക്കുള്ള സിം കാര്‍ഡിന്റെ വിതരണോദ്ഘാടനം നിര്‍വഹിക്കുകയായിരുന്നു അദ്ദേഹം. പദ്ധതി സംബന്ധിച്ച് യാതൊരു ആശങ്കയും വേണ്ട.
കൃഷിഭൂമിയാണെന്ന് സത്യവാങ്മൂലം നല്‍കിയാല്‍ ഭൂമി ഡാറ്റാബാങ്കിലേക്ക് പോകും, വീടുവയ്ക്കാന്‍ സാധിക്കില്ല എന്നിങ്ങനെയുള്ള പ്രചരണങ്ങളാണ് നടക്കുന്നത്. ഇതിനെതിരേ പൊലിസില്‍ പരാതി നല്‍കും. പദ്ധതിയുടെ ഭാഗമാകുന്നതുകൊണ്ട് കൃഷിക്കാര്‍ക്ക് യാതൊരു പ്രശ്‌നവുമുണ്ടാകില്ല. നെല്‍വയല്‍ തണ്ണീര്‍ത്തട നിയമവുമായി പദ്ധതിക്ക് യാതൊരു ബന്ധവുമില്ലെന്നും മന്ത്രി വ്യക്തമാക്കി. കൃഷി വകുപ്പ് സെക്രട്ടറി ദേവേന്ദ്രകുമാര്‍ സിങ്, ഡയരക്ടര്‍ പി.കെ ജയശ്രീ പങ്കെടുത്തു.