പാന്‍മസാല വില്‍പന നടക്കുന്നുണ്ടെന്നറിഞ്ഞാണ് എക്‌സൈസ് സംഘമെത്തിയത്
നെടുമങ്ങാട്: പരിശോധനക്കെത്തിയ എക്‌സൈസ് സംഘത്തിന് മുന്നില്‍ വയോധികന്റെ ആത്മഹത്യഭീഷണി. ഒടുവില്‍ പൊലിസിന്റെ സഹായത്തോടെ ഇയാളെ എക്‌സൈസ് കസ്റ്റഡിയിലെടുത്തു.
നിരോധിത പാന്‍മസാലകള്‍ വില്പന നടത്തുണ്ടെന്ന വിവരത്തിന്റെ തുടര്‍ന്ന് ആര്യനാട് എക്‌സൈസ് ഇന്‍സ്‌പെക്ടര്‍ ഷമീറിന്റെ നേതൃത്വത്തില്‍ ഇന്നലെ രാവിലെയാണ് സംഘം കോട്ടൂര്‍ അഫ്‌സല്‍ മന്‍സിലില്‍ നസീറി (50) ന്റെ വീട്ടിലെത്തിയത്.
പാന്‍മസാല വില്‍പന നടത്തുന്നതിനിടെ നസീറിനെ സംഘം കൈയോടെ പിടികൂടി. എന്നാല്‍ വീട്ടിനുള്ളില്‍ പരിശോധന നടത്താന്‍ ഇയാള്‍ എക്‌സൈസ് സംഘത്തെ അനുവദിച്ചില്ല. ഒടുവില്‍ എക്‌സൈസ് സംഘത്തെ ഭയപ്പെടുത്തുന്നതിനായി വീട്ടിനുള്ളില്‍ നിന്നും മണ്ണെണ്ണ എടുത്ത് നസീര്‍ ദേഹത്ത് ഒഴിക്കാന്‍ ശ്രമിച്ചു. തുടര്‍ന്നാണ് പൊലിസിനെ വിവരമറിയിച്ചത്. പൊലിസിന്റെ സഹായത്തോടെ വീട്ടിനുള്ളില്‍ പരിശോധന നടത്തിയെങ്കിലും കൂടുതലൊന്നും കണ്ടെത്താനായില്ലെന്ന് എക്‌സൈസ് അധികൃതര്‍ അറിയിച്ചു. പാന്‍മസാല വില്‍പന നടത്തുന്നതുമായി ബന്ധപ്പെട്ട് ഇയാളെക്കുറിച്ച് നിരവധി പരാതികള്‍ ലഭിച്ചതായും എക്‌സൈസ് അധിക്യതര്‍ അറിയിച്ചു. ഇയാളെ പിന്നീട് എക്‌സൈസ് ഓഫിസിലെത്തിക്കുകയും തുടര്‍ നടപടിയ്ക്കായി നെയ്യാര്‍ഡാം പൊലിസിന് കൈമാറുകയും ചെയ്തു. ശേഷം സ്റ്റേഷന്‍ ജാമ്യത്തില്‍ വിട്ടയച്ചു.